40 மக்களவைத் தொகுதிகளிலும் பாஜக தோல்வியடைந்த நிலையில் தமிழக பாஜக தலைவர் அண்ணாமலைக்கு எதிராக, அந்தக் கட்சியின் மூத்த தலைவர்கள் பலரும் கருத்து தெரிவிக்க ஆரம்பித்துள்ளனர். பாஜகவின் சிந்தனையாளர் பிரிவின் பொறுப்பாளர் கல்யாணராமன் பல அதிர்ச்சிகரமான குற்றசாட்டுகளை முன்வைத்து வருகிறார்.
கல்யாண ராமன் வெளியிட்டுள்ள எக்ஸ் பதிவில், ‘ கூட்டணி குறித்து தமிழிசை சௌந்தரராஜன் மற்றும் எஸ்.பி.வேலுமணி இருவரும் குறிப்பிட்டுள்ள உண்மை சரியானது. ஆனால், அண்ணாமலை வழக்கம் போல் மத்திய தலைமையை தவறாக வழிநடத்த முயற்சிக்கிறார்.
2014 தேர்தலை விட இப்போது வாக்குகளை குறைவாக பாஜக பெற்றுள்ளது என்பது அப்பட்டமான உண்மை. 2014ல் பாஜக கூட்டணி 18.8% பெற்றது, தற்போது 18.2% ஆக குறைந்துள்ளது உள்ளது, அதுவும் 2014ல் 38 தொகுதிகளில்தான் பாஜக கூட்டணி போட்டியிட்டது.
2014ல் பாஜக 5.56% வாக்குகளைப் பெற்றோம், இப்போது எங்களுக்கு 11.24% கிடைத்தது என்பது தவறான மற்றொரு அறிக்கை. அப்போது 9 இடங்களில் போட்டியிட்டதன் மூலம் 5.56% பெற்றோம். இப்போது 23 இடங்களில் போட்டியிட்டு 11.24% பெற்றுள்ளனர். விகித அடிப்படையில், 2014 செயல்திறனை சமன் செய்ய பாஜக இப்போது சுமார் 14.25% பெற்றிருக்க வேண்டும்.
பொன்.ராதாகிருஷ்ணன் தலைமையில் 2014ல் போட்டியிட்ட 9 இடங்களில் வெறும் 2 இடங்களில் மட்டுமே டெபாசிட் இழந்தோம். இப்போது போட்டியிட்ட 23ல் 11ல் டெபாசிட் இழந்துள்ளோம், இது மிகப்பெரும் இழப்பு.
இன்னொரு உண்மை, கோவையில் அப்போது பாஜகவின் சிபிஆர் 42 ஆயிரம் வாக்குகள் வித்தியாசத்தில் மட்டுமே தோற்றார். இப்போது அண்ணாமலை இதைவிட 3 மடங்கு அதிக வாக்கு வித்தியாசத்தில் தோல்வியடைந்துள்ளார். இன்னொரு முக்கிய உண்மை. அப்போது பொன்.ராதாகிருஷ்ணன் மற்றும் சிபிஆருக்கு தேர்தலில் போட்டியிட பணம் இல்லை. சில சமயங்களில் கட்சியை வளர்ப்பதற்காக அவர்கள் தங்கள் சொத்துக்களை விற்றார்கள் என்பது எனக்குத் தெரியும். இப்போது அண்ணாமலையைப் பற்றி நமக்குத் தெரியும்.
தன்னிடம் கொஞ்சமும் தார்மீகம் உள்ள எந்த மனிதனும் இந்த தோல்விக்கு ராஜினாமா செய்வார் அல்லது குறைந்தபட்சம் ராஜினாமா செய்கிறேன் என்றாவது சொல்வார். ஆனால் அண்ணாமலைக்கு நேர்மை குறைவு என்பது எனக்குத் தெரியும்’ என்று தெரிவித்தார்
அவரின் மற்றொரு பதிவில், ‘பெரியவர்களையும், மூத்தவர்களையும் குறைகூறுவது அண்ணாமலையின் வார்ரூம் கடைபிடித்த ஒரு வழிமுறையாகும். அண்ணாமலை மட்டுமே திறமையானவர், அவருக்கு நிகரானவர் யாரும் இல்லை என்பதை உயர்மட்ட தலைமைக்குக் காட்ட பாஜக வார்ரூம் செயல்படுகிறது.
அண்ணாமலை, எடப்பாடி பழனிசாமியை எதிர்த்துப் போராடியது, அவர் சமூகத்தில் தனது மேலாதிக்கத்தை நிலைநிறுத்துவதற்காகவே தவிர, உண்மையில் அதற்கு மேல் எதுவும் இல்லை. செல்வச் செழிப்பைக் கொண்ட ஒரு சமூகம், எந்தப் போட்டியும் இல்லாமல் அவரை நிபந்தனையின்றி ஆதரித்தால், நாளடைவில் அவர் தமிழகத்தில் முக்கிய நபராக மாறலாம் என நினைத்தார். அவருக்கு அகில இந்திய பாஜக தோல்வியடைந்தாலும் பரவாயில்லை.
திருநெல்வேலி பாஜக தலைவர் தயாசங்கர் என்பவர் மாடுகளை இறைச்சிக் கூடத்திற்கு விற்பதற்கு எதிராகப் போராடியதற்காக கைது செய்யப்பட்டார். இதுகுறித்து சென்னை பாஜக அலுவலகத்தில் செய்தி வந்தபோது, அண்ணாமலைக்கு எதிரே அமர்ந்திருந்தேன். அவர் ஒரு அதிர்ச்சியான கருத்தை கூறினார். ‘அந்த பையன் சில நாட்கள் சிறையில் வாடட்டும்; எல்லோரும் தானே தலைவர்களாக மாற முயல்கிறார்கள்’ என்றார். அண்ணாமலையின் மலிவு மனப்பான்மையை பாருங்கள். இது போன்ற கதைகள் இன்னும் நிறைய சொல்லலாம். அண்ணமலையின் முதிர்ச்சியின்மை, ஆணவம், சூழ்ச்சி ஆகியவற்றை வெளிக்காட்ட இது ஒன்றே போதும்” என்று தெரிவித்துள்ளார்.
கல்யாணராமனின் மற்றொரு பதிவில், ‘அண்ணாமலை டெல்லியில் ஒரு சுற்றுச்சூழல் அமைப்பை உருவாக்கியுள்ளார். அது அவரைப் பாதுகாக்கிறது. ஆனால் கட்சியை வளர்க்க தங்களால் இயன்றதை செய்த பொன்.ராதாகிருஷ்ணன், ஹெச்.ராஜா, சிபிஆர், தமிழிசை, எல்.கணேசன் போன்றோருக்கு எங்காவது நீதி கிடைக்க வேண்டும். ஏனென்றால் அண்ணாமலை தலைமையிலான வார்ரூம் குண்டர்களால் அவர்கள் அனைவரும் சிறுமைப்படுத்தப்பட்டனர்
அண்ணாமலை யார், அவர் கர்நாடகாவில் என்ன செய்துகொண்டிருந்தார். உளவு பார்த்ததற்காக அப்போதைய அரசியல் தலைமையால் அவர் எப்படி கர்நாடகாவிலிருந்து வெளியேற்றப்பட்டார் என்பது பற்றி ஒரு துளிகூட யோசனை இல்லாத பலர் அவரின் வார் ரூமில் உள்ளனர். கட்சியின் பணத்தை கொண்டு அண்ணாமலையின் வார்ரூம் அவரை விளம்பரப்படுத்தவும், சொந்தக் கட்சித் தலைவர்களை வசைபாடவும் தான் செயல்படுகிறது
கிருஷ்ணகுமார், அமர்பிரசாத் ரெட்டி போன்ற பலர் பாஜக கட்சிப் பணத்திலிருந்து லட்சக்கணக்கில் சம்பளத்தை பெறுவது மட்டுமல்லாமல் அமலாக்கத்துறை வழக்கில் சிக்கியவர்கள், தங்கம் கடத்துபவர்கள், கோடிக்கணக்கில் மோசடி செய்பவர்களிடமிருந்து பணம் பறிப்பது போன்று மாஃபியாவாக செயல்படுகின்றனர்
ஆளுநர் எல்.கணேசனின் குடும்பத்தில் சில நிகழ்ச்சிகள் நடைபெறுவதையொட்டி, முதல்வர் மம்தா சந்திக்க வந்தபோது, அரசியல் முதிர்ச்சியின் ஒரு பகுதி இது என்று தெரியாமல் இந்த வார் ரூம் குண்டர்கள் அவரை வசைபாடினர். அண்ணாமலை புதிதாக யாரும் உருவாக வேண்டும் என்று ஒருபோதும் விரும்பியதில்லை, மேலும் முக்கியமானவர்களை எல்லாம் முடித்துவிட வேண்டும் என விரும்புகிறார். அவர் அமர்பிரசாத்ரெட்டி போன்ற ஆட்களை எதற்காக வளர்த்துவிடுகிறார் கடவுளுக்குத்தான் தெரியும்” என்று தெரிவித்துள்ளார். கல்யாணராமனின் இந்த குற்றச்சாட்டுகள் அண்ணாமலை ஆதரவாளர்களை அதிர்ச்சியடைய வைத்துள்ளன.
இதையும் வாசிக்கலாமே...
மத்திய அமைச்சராகும் அண்ணாமலை... தயாராகும் பட்டியல்!
தமிழகத்தில் அடுத்த 3 மணி நேரத்தில் 12 மாவட்டங்களில் மழை!
நடிகை கங்கனாவை அறைந்தது ஏன்?: சிஐஎஸ்எஃப் பெண் காவலர் விளக்கம்!
நள்ளிரவில் அதிர்ச்சி... மீன் வியாபாரி உட்பட இருவரை சரமாரியாக வெட்டிக்கொன்ற கும்பல்!
பெங்களூரு நீதிமன்றத்தில் இன்று நேரில் ஆஜராகிறார் ராகுல்காந்தி