ஓபிஎஸ்சின் குற்றச்சாட்டு ஆதாரமற்றது! - தமிழக அமைச்சர் பதிலடி

ஓபிஎஸ்சின் குற்றச்சாட்டு ஆதாரமற்றது! - தமிழக அமைச்சர் பதிலடி

நிசான் தொழிற்சாலை மூடப்படும் சூழல் உருவாகிடக் கூடும் என்ற அதிமுக ஒருங்கிணைப்பாளர் ஓ.பன்னீர்செல்வத்தின் கூற்று முற்றிலும் கற்பனையானது. ஆதாரமற்றது என்று தமிழக தொழில்துறை அமைச்சர் தங்கம் தென்னரசு கூறியுள்ளார்.

அதிமுக ஒருங்கிணைப்பாளர் ஓ. பன்னீர்செல்வம் நேற்று வெளியிட்ட அறிக்கையில், "சென்னையில் இயங்கிக் கொண்டிருக்கும் ஜப்பான் நாட்டின் நிசான் மோட்டார் நிறுவனத்தின் துணை நிறுவனமான நிசான் மோட்டார் இந்தியா தொழிற்சாலை மூடப்படுவதை தமிழக அரசு தடுத்து நிறுத்த வேண்டும்.

இந்தப் பிரச்சினையில் முதல்வர் ஸ்டாலின் உடனடியாக தலையிட்டு, நிர்வாகத்திடம் பேச்சுவார்த்தை நடத்தி நிசான் மோட்டார் நிறுவனம் தொடர்ந்து இயங்க நடவடிக்கை எடுக்க வேண்டும்" என வேண்டுகோள் விடுத்திருந்தார். இதற்கு தமிழக தொழில்துறை தங்கம் தென்னரசு இன்று பதில் அளித்துள்ளார்.

இது தொடர்பாக அவர் கூறுகையில், "நிசான் தொழிற்சாலை மூடப்படும் சூழல் உருவாகிடக் கூடும் என்ற கூற்று முற்றிலும் கற்பனையானது. தொழிற்சாலை தொடர்ந்து இயங்கும் சூழலில் தொழிலாளர்களுக்கு வேலை இழப்பு ஏற்படும் எனக் கூறுவது உண்மைக்கு மாறானது. தமிழ்நாடு அரசின் மீது ஏதாவது ஒரு வகையில் குற்றம் சுமத்த வேண்டும் என்ற நோக்கத்தில் மட்டுமே ஒ.பன்னீர் செல்வம் அறிக்கை வெளியிட்டுள்ளார். அது அனுமானமே தவிர அடிப்படை ஆதாரமற்றது. அதிமுக ஆட்சியில்தான் நோக்கியா தொழிற்சாலை மூடப்பட்டு, பல்லாயிரம் தொழிலாளர்கள் வேலை இழந்தார்கள்" என்று தெரிவித்துள்ளார்.

Related Stories

No stories found.
x
காமதேனு
kamadenu.hindutamil.in