கூடங்குளம் அணுஉலை வளாகத்தில் அபாயகரமான அணுக்கழிவுகளை சேமிப்பதா? -வைகோ கண்டனம்

கூடங்குளம் அணுஉலை வளாகத்தில் அபாயகரமான அணுக்கழிவுகளை சேமிப்பதா? -வைகோ கண்டனம்
வைகோ(கோப்புப் படம்)

கூடங்குளம் அணுஉலை வளாகத்தில் அபாயகரமான அணுக்கழிவுகளை சேமிப்பதற்கு கண்டனம் தெரிவித்து, மதிமுக பொதுச் செயலாளர் வைகோ இன்று(பிப்.11) அறிக்கை வெளியிட்டுள்ளார்.

மதிமுக பொதுச் செயலாளர் வைகோ வெளியிட்டுள்ள அறிக்கை:

‘கூடங்குளம் அணுமின் உற்பத்தி நிலையத்தில், முதல் 2 அலகுகள் 1000 மெகாவாட் மின் உற்பத்தித் திறன் கொண்டதாக அமைக்கப்பட்டன. 3, 4-வது அலகுகளின் கட்டுமானப் பணிகள் தொடங்கி நடக்கின்றன. மேலும் 5, 6-வது அலகுகளுக்கும் இந்திய அணுசக்திக் கழகம் அனுமதி அளித்துள்ளது.

அணுமின் நிலையத்தில் உருவாகும் கதிரியக்க அபாயம்கொண்ட அணுக்கழிவுகளை பாதுகாப்பாக அகற்றவும், உரிய முறையில் சேமிக்கவும் இந்திய அணுசக்திக் கழகத்திடம் திட்டங்கள் இல்லை என்பதால், 2013-ம் ஆண்டு பூவுலகின் நண்பர்கள் அமைப்பு உச்ச நீதிமன்றத்தில் வழக்குத் தொடர்ந்தது. இதில், உச்ச நீதிமன்றம் பிறப்பித்த உத்தரவில் அணுக்கழிவுகளை சேமித்து வைத்திட தொலைவில் ஒரு இடம் (Away From Reactor – AFR), அணுக்கழிவுகளை நிரந்தரமாகப் பாதுகாக்க ஆழ்நில கருவூல மையம் (Deep Geological Repository - DGR) ஆகிய 2 வகையான கட்டமைப்புகளை உருவாக்க வேண்டும். அணுக்கழிவுகளை உலைக்கு வெளியே வைப்பதற்கான கட்டமைப்பு 5 ஆண்டுகளில் அமைக்கப்பட வேண்டும் என்று தெரிவிக்கப்பட்டது.

உச்ச நீதிமன்றம் வழங்கிய கால அவகாசத்துக்குள், தேசிய அணுமின் கழகம் இத்தகைய தொழில் நுட்பத்தை வடிவமைப்பதில் சிக்கல் எழுந்ததால், மேலும் 5 ஆண்டுகள் கால அவகாசத்தை நீட்டிக்கக் கோரியது. அணுக்கழிவுகளைப் பாதுகாக்கும் பெட்டகத்தை, 2022 ஏப்ரல் மாதத்துக்குள் அமைக்க வேண்டும் என்று 2018 ஆகஸ்ட் 24-ல் உச்ச நீதிமன்றம் உத்தரவிட்டது.

இதன் தொடர்ச்சியாக, கூடங்குளம் அணுஉலை வளாகத்தினுள் ‘ஏஎஃப்ஆர்’ பாதுகாப்புக் கட்டமைப்பை அமைத்திட திட்டமிட்ட தேசிய அணுமின் கழகம், அதற்கான பணிகளைத் தொடங்கிட 2019 ஜூலை 10-ம் நெல்லை மாவட்டம், இராதாபுரத்தில் மாசுக்கட்டுப்பாட்டு வாரியத்தின் மூலம் பொதுமக்கள் கருத்துக் கேட்புக் கூட்டத்துக்கு அழைப்பு விடுத்தது.

கூடங்குளம் அணு உலைகளையே நிரந்தரமாக மூட வேண்டும் என்று மக்கள் போராடிவரும் நிலையில், அணுஉலை வளாகத்தினுள்ளேயே அபாயகரமான அணுக்கழிவுகளைச் சேமித்து வைத்திட கட்டமைப்புகளை உருவாக்க, தேசிய அணுமின் கழகம் 2021 டிசம்பரில் ஒப்பந்தப் புள்ளிகளைக் கோரியுள்ளது. பிப்ரவரி 24-ம் தேதிக்குள் நிறுவனங்கள் தங்கள் ஒப்பந்தப் புள்ளிகளை இணையம் மூலமாக தாக்கல் செய்யலாம் என்று அறிவிப்பு வெளியிடப்பட்டுள்ளது.

இந்நிலையில், கூடங்குளம் அணுஉலை குறித்து நாடாளுமன்றத்தில் சிபிஎம் உறுப்பினர் தோழர் சு.வெங்கடேசன் எழுப்பிய கேள்விக்கு பதில் அளித்துள்ள ஒன்றிய இணை அமைச்சர் ஜிதேந்திரசிங், ‘கூடங்குளத்தில் உற்பத்தியாகும் அணுக்கழிவுகளை முதலில் சில ஆண்டுகள் அணு உலைகளுக்குள் உள்ள தொட்டியில் பாதுகாக்கப்பட்டு, பிறகு மறுசுழற்சி மையத்துக்கு எடுத்துப்போகும்வரை அருகில் உள்ள மையத்தில் (AFR) வைக்கப்படும்’ என்று கூறியுள்ளார்.

இதன் மூலம், ‘கூடங்குளம் போன்ற அணு உலைகளிலிருந்து வரக்கூடிய அணுக்கழிவுகளை கையாள்வதற்கான தொழில்நுட்பம் இந்தியாவில் இல்லை’ என்பதை அமைச்சர் ஜிதேந்திர சிங் மறைமுகமாக ஒப்புக்கொண்டுள்ளார். மேலும், அணுக்கழிவுகளைச் சேமிக்க ஆழ்நில அணுக்கழிவு மையம் (DGR) தற்போது தேவைப்படவில்லை என்றும் தெரிவித்திருக்கிறார். ஒன்றிய அரசின் இந்த நிலைப்பாடு உச்ச நீதிமன்றத்தின் உத்தரவுக்கு எதிரானது ஆகும்.

கூடங்குளத்தில் அணுஉலை வளாகத்தினுள் அணுக்கழிவு மையத்தை அமைத்து, அதில் கூடங்குளம் மட்டுமின்றி, இந்தியாவில் செயல்பட்டு வரும் 22 அணு உலைகளின் கழிவுகளையும் கொண்டுவந்து குவிப்பதற்கான அபாயகரமான திட்டத்தைச் செயல்படுத்த ஒன்றிய பாஜக அரசு முனைந்திருப்பது கடும் கண்டனத்துக்குரியது.

ஒன்றிய அரசின் இத்தகைய முயற்சிகளை முறியடிப்பதுடன், கூடங்குளத்தில் அணுஉலை 3, 4-வது அலகுகள் அமைத்திட மாசுக்கட்டுப்பாட்டு வாரியம் அளித்த அனுமதியையும் நிறுத்திவைக்க தமிழ்நாடு அரசு நடவடிக்கை மேற்கொள்ள வேண்டும். கூடங்குளத்தில் எக்காரணத்தைக் கொண்டும் அணுஉலைக் கழிவுகளை கொண்டுபோய் சேமித்துவைக்கும் திட்டத்தைச் செயல்படுத்த அனுமதிக்கக் கூடாது என்று வலியுறுத்துகிறேன்’ என்று அறிக்கையில் வைகோ கூறியுள்ளார்.

Related Stories

No stories found.