சென்னை மாநகராட்சியில் மண்டல வாரியாக மகளிருக்கு 50% ஒதுக்கீடு ரத்து!

உயர் நீதிமன்றம் உத்தரவு
சென்னை மாநகராட்சியில் மண்டல வாரியாக மகளிருக்கு 50% ஒதுக்கீடு ரத்து!
தி இந்து

சென்னை மாநகராட்சியில், மண்டலவாரியாக பெண்களுக்கு 50 சதவீத ஒதுக்கீடு வழங்கும் தமிழக அரசின் அரசாணையை ரத்து செய்துள்ளது சென்னை உயர் நீதிமன்றம்.

சென்னை மாநகராட்சியில் பெண்களுக்கான வார்டுகளை ஒதுக்கீடு செய்தது தொடர்பாக பிரபாகரன் என்பவர் உயர் நீதிமன்றத்தில் மனு ஒன்றை தாக்கல் செய்திருந்தார். அந்த மனுவில், "சென்னை மாநகராட்சியில் மண்டல வாரியாக வார்டுகளை ஒதுக்கீடு செய்யாமல், மாநகராட்சியின் ஒட்டுமொத்த வார்டுகளையும் ஆண்களுக்கும், பெண்களுக்கும் சமமாகப் பிரித்து வழங்க வேண்டும். சென்னை மாநகராட்சியில் மொத்தமுள்ள 200 வார்டுகளில் பட்டியலின, பழங்குடியின மற்றும் அவற்றில் பெண்களுக்கென 32 வார்டுகள் ஒதுக்கப்படும் நிலையில், மீதமுள்ள 168 இடங்களில் பொதுப்பிரிவில் பெண்களுக்கு 89 இடங்களும், ஆண்களுக்கு 79 இடங்களும் ஒதுக்கப்பட்டுள்ளது" என்று குறிப்பிட்டிருந்தார்.

இதற்கு பதில் அளித்த சென்னை மாநகராட்சி, “கடந்த 2016-ம் ஆண்டு பிறப்பிக்கப்பட்ட தமிழ்நாடு நகராட்சி சட்டத்தின் அடிப்படையில் பெண்களுக்கான 50 சதவீதம் இட ஒதுக்கீடாக, 84 இடங்கள்தான் பெண்களுக்கு ஒதுக்கப்பட்டிருக்க வேண்டும். ஆனால், மண்டல வாரியாக வார்டுகளைப் பிரித்து பெண்களுக்கு ஒதுக்குவதால், அவர்களுக்கு கூடுதல் வார்டுகள் வருகின்றன" என்று தெரிவித்தது. இந்த வழக்கை விசாரித்த உயர் நீதிமன்றம், சென்னை மாநகராட்சி தேர்தல் தொடர்பான அரசின் நடவடிக்கைகள் இந்த வழக்கின் இறுதித் தீர்ப்புக்கு உட்பட்டது என அறிவுறுத்தியிருந்தது.

இந்த வழக்கு, தலைமை நீதிபதி முனீஷ்வர்நாத் பண்டாரி, நீதிபதி ஆதிகேசவலு அடங்கிய அமர்வில் மீண்டும் விசாரணைக்கு வந்தபோது, தமிழக அரசு தரப்பில் ஆஜரான தலைமை வழக்கறிஞர் சண்முகசுந்தரம், அரசியல் சட்டத்தின் 243 டி உட்பிரிவு 3, மூன்றில் ஒரு பகுதிக்கு குறையாமல் பெண்களுக்கு இட ஒதுக்கீடு வழங்க வகை செய்வதாகவும், அந்த வகையில் 50 சதவீத இட ஒதுக்கீடு வழங்கப்பட்டுள்ளதாகவும், வார்டு எல்லை மறுவரையறை அடிப்படையில் மண்டல வாரியாக சுழற்சி முறையில் இந்த இட ஒதுக்கீடு வழங்கப்படுகிறது என்றும் தெரிவித்தார்.

சென்னை உயர் நீதிமன்றம்
சென்னை உயர் நீதிமன்றம்தி இந்து

ஆனால், “வார்டு வாரியாக பெண்களுக்கு இட ஒதுக்கீடு வழங்க எந்தக் காரணத்தையும் அரசு தெரிவிக்கவில்லை” என மனுதாரர் தரப்பு வழக்கறிஞர் ஆர்.பிரபாகரன் குறிப்பிட்டார். இதையடுத்து, “வார்டு வாரியாக இல்லாமல், மொத்தமாக மாநகராட்சியை ஒரு யூனிட்டாகக் கருதி ஏன் இடஒதுக்கீடு வழங்கக் கூடாது” எனக் கேள்வி எழுப்பிய நீதிபதிகள், “மண்டல வாரியாக எந்தெந்த மாநிலங்களில் பெண்களுக்கு இடஒதுக்கீடு வழங்கப்படுகிறது” என தெரிவிக்க உத்தரவிட்டு, விசாரணையை தள்ளிவைத்தனர்.

இந்நிலையில், வழக்கு இன்று விசாரணைக்கு வந்தபோது, சென்னை மாநகராட்சியில் மண்டலவாரியாக பெண்களுக்கு 50 சதவீத ஒதுக்கீடு வழங்கும் தமிழக அரசின் அரசாணையை ரத்து செய்து உத்தரவிட்ட நீதிபதிகள், “சென்னை மாநகராட்சியில் உள்ள மொத்த வார்டுகளின் எண்ணிக்கையின் அடிப்படையிலேயே பெண்களுக்கு 50 சதவீதம் ஒதுக்கீடு வழங்க வேண்டும்” என்று தமிழக அரசுக்கு உத்தரவிட்டனர்.

Related Stories

No stories found.