தெலங்கானாவில் அடுத்த ஆண்டு நடைபெறவுள்ள சட்டமன்ற தேர்தலில் அனைத்து தொகுதிகளிலும் தனது கட்சி போட்டியிடும் என ஆந்திர மாநில முதல்வர் ஜெகன் மோகன் ரெட்டியின் சகோதரி ஒய்.எஸ்.சர்மிளா தெரிவித்துள்ளார்.
ஒய்.எஸ். ஷர்மிளா கடந்த ஆண்டு ஒய்எஸ்ஆர் தெலங்கானா கட்சியை (ஒய்எஸ்ஆர்டிபி) தொடங்கினார். அவர் தற்போது தனது சகோதரரும், ஆந்திர பிரதேச முதல்வருமான ஒய்.எஸ்.ஜெகன் மோகன் ரெட்டியின் ஆதரவு தனக்கு ஒரு பொருட்டல்ல என்றும், 2023 தெலங்கானா சட்டமன்றத் தேர்தலில் 119 தொகுதிகளிலும் தனது கட்சி போட்டியிடுவதை நோக்கமாகக் கொண்டுள்ளது என்றும் கூறியுள்ளார்.
தனியார் செய்தி நிறுவனத்துக்கு ஷர்மிளா அளித்த நேர்காணலில், 2023ல் ஆளும் தெலங்கானா ராஷ்டிர சமிதிக்கு முக்கிய போட்டியாளராக தனது ஒய்எஸ்ஆர்டிபி கட்சி இருக்கும் என்று உறுதியளித்தார். மேலும், தெலங்கானா மாநிலத்தில் எந்தக் கூட்டணியும் இல்லாமல் தனது கட்சி போட்டியிடும் எனவும் தெரிவித்தார். அவர், “மறைந்த தனது தந்தை ஒய்.எஸ்.ஆரின் ஆட்சியை மீண்டும் கொண்டு வர வேண்டும் என்ற ஒரே நோக்கத்துடன் தான் கட்சியை தொடங்கினேன். ஆரம்பத்தில் பலர் என்னை நிராகரித்தனர், ஒய்.எஸ்.ஆரின் மகளாக இருப்பது எனக்கு ஒரு ஏவுதளமாக மட்டுமே இருக்கும்; மக்கள் உண்மையில் எனது திறமையைப் பார்ப்பார்கள்” என்று கூறினார்.
ஷர்மிளா கடந்த ஆண்டு அக்டோபர் மாதம் முதல் தெலுங்கானாவில் நடைபயணத்தில் ஈடுபட்டுள்ளார். இதுவரை, 3,300 கி.மீ தூரம் நடந்து, மாநிலத்தில் உள்ள 64 தொகுதிகளை கடந்துள்ளார். தனது அரசியல் பயணத்திற்கு தனது சகோதரரின் ஆதரவைப் பற்றி கேள்விக்கு பதிலளித்த ஷர்மிளா, “ஜெகனின் ஆதரவு முக்கியமில்லை. இப்போது, நாம் ஒருவருக்குச் செய்யும் உதவி அவர்கள் திருப்பிச் செலுத்துவார்கள் என்று அர்த்தமல்ல” என தெரிவித்தார்.
2013ல் ஜெகன்மோகன் ஊழல் குற்றச்சாட்டில் சிறையில் இருந்தபோதும், ஒய் எஸ் ஆர் கட்சியின் தொடக்கத்தின் போதும் ஷர்மிளா ஆந்திராவில் பாதயாத்திரை நடத்தினார். ஆந்திராவில் 2019 சட்டமன்றத் தேர்தலின்போதும் ஜெகனுக்காக அவர் பிரச்சாரம் செய்தார். ஆனால், ஆட்சியமைத்த பின்னர் ஜெகன் மோகனின் அமைச்சரவையில் ஷர்மிளா இடம்பெறவில்லை. அவருக்கு ராஜ்யசபா சீட்டும் வழங்கப்படவில்லை. இதனால் இருவருக்கும் இடையிலான உறவில் விரிசல் ஏற்பட்டதாக சொல்லப்படுகிறது.
தனது கட்சி பாஜகவின் “பி-டீம்” என்ற குற்றச்சாட்டுகளுக்கு பதிலளித்த ஷர்மிளா, “அப்படி இருந்திருந்தால், தெலுங்கானாவில் சொந்தக் கட்சியைத் தொடங்கி அதை நிலைநிறுத்தப் போராடுவதை விட பாஜக அல்லது காங்கிரஸில் சேர்ந்திருப்பேன்” என்று தெரிவித்தார்.