பாதுகாப்புக் குறைபாடு காரணமாக நடைபயணத்தை நிறுத்தினார் ராகுல் காந்தி: நடந்தது என்ன?

பாதுகாப்புக் குறைபாடு காரணமாக ஜம்மு-காஷ்மீரில் இன்று ராகுல் காந்தியின் பாரத் ஜோடோ யாத்திரை ரத்து செய்யப்பட்டது. காஷ்மீரில் 20 கிலோமீட்டர் தூரம் நடக்க இருந்த ராகுல் காந்தி, சுமார் ஒரு கி.மீ.க்குப் பிறகு பயணத்தை தொடர முடியவில்லை. ஜம்மு காஷ்மீர் முன்னாள் முதல்வரும், தேசிய மாநாட்டு கட்சியின் தலைவருமான உமர் அப்துல்லாவும் உடன் இருந்தார்.

ராகுல் காந்தி ஸ்ரீநகருக்குச் செல்லும் வழியில் பனிஹால் சுரங்கப்பாதையைக் கடந்தபோது, ஒரு எதிர்பாராத மிகப்பெரிய கூட்டம் அங்கே கூடியிருந்ததாக காங்கிரஸ் தலைவர்கள் குற்றம்சாட்டினர். இதனைத் தொடர்ந்து பாரத் ஜோடோ யாத்திரை இன்று நிறுத்தப்பட்டது.

இதன் பின்னர் செய்தியாளர்களிடம் பேசிய ராகுல் காந்தி, "கூட்டத்தை நிர்வகிக்க வேண்டிய போலீஸ் பணியாளர்கள் எங்கும் காணப்படவில்லை. நாங்கள் சுரங்கப்பாதையை விட்டு வெளியேறிய பிறகு காவல்துறையின் ஏற்பாடு முற்றிலுமாக சிதைந்தது, கூட்டத்தைக் கட்டுப்படுத்த வேண்டிய காவல்துறையினரை எங்கும் காணவில்லை. நான் யாத்திரையில் மேலும் நடந்து செல்வதால் எனது பாதுகாப்புப் பணியாளர்கள் மிகவும் சிரமப்பட்டனர். இதனால் எனது பாதுகாப்பு சங்கடமானது, எனவே நாங்கள் நடைப்பயணத்தை நிறுத்த வேண்டியிருந்தது” என்று கூறினார்.

கூட்டத்தைக் கட்டுப்படுத்துவதற்கு உத்தரவாதம் அளிப்பது அரசு நிர்வாகத்தின் பொறுப்பு. ஆனால் பாதுகாப்புப் பணியாளர்கள் திடீரென திரும்பப் பெறப்பட்டார்கள். ஜம்மு காஷ்மீர் நிர்வாகம் கூட்டத்தை தவறாக நிர்வகித்தது என்று காங்கிரஸ் குற்றம் சாட்டியுள்ளது.

இன்றைய தினம் சுரங்கத்தை தாண்டிய பிறகு ராகுல் காந்தியால் சுமார் 30 நிமிடங்கள் நகர முடியவில்லை. இறுதியில், அவர் பாதுகாப்பு வாகனத்தில் அழைத்துச் செல்லப்பட்டார் என காங்கிரஸ் தரப்பில் கூறப்பட்டுள்ளது. "பனிஹால் சுரங்கப்பாதையை கடந்ததும் போலீசார் விரட்டியடித்தனர். இதற்கு யார் உத்தரவிட்டது? இதற்கு பொறுப்பான அதிகாரிகள் பதில் அளித்து எதிர்காலத்தில் இதுபோன்ற சம்பவங்கள் நடக்காமல் இருக்க நடவடிக்கை எடுக்க வேண்டும். 15 நிமிடங்களாக பாதுகாப்பு அதிகாரிகள் யாரும் இல்லை " என காங்கிரஸ் தலைவர் கே.சி.வேணுகோபால் கூறினார்.

மோசமான வானிலை மற்றும் நிலச்சரிவு காரணமாக யாத்திரை முன்னதாக புதன்கிழமை நிறுத்தப்பட்டது.

செப்டம்பர் 7-ம் தேதி தமிழகத்தின் கன்னியாகுமரியில் தொடங்கிய பாரத் ஜோடோ யாத்திரை 3,970 கிமீ தூரம், 12 மாநிலங்கள் மற்றும் 2 யூனியன் பிரதேசங்களைக் கடந்து ஜனவரி 30-ம் தேதி ஸ்ரீநகரில் முடிவடைகிறது.