டெல்லி மற்றும் பஞ்சாபில் ஆம் ஆத்மி அரசுகளை கவிழ்க்க பாஜக போட்ட திட்டம் படுதோல்வி அடைந்தது. டெல்லி அரசை அவர்களால் கவிழ்க்க முடியவில்லை என ஆம் ஆத்மி ஒருங்கிணைப்பாளர் அர்விந்த் கேஜ்ரிவால் தெரிவித்துள்ளார்.
திகார் சிறையில் இருந்து விடுதலையான பிறகு முதன்முறையாக டெல்லி முதல்வர் அர்விந்த் கேஜ்ரிவால், இன்று தனது இல்லத்தில் தனது கட்சி எம்எல்ஏக்களை சந்தித்து பேசினார். அப்போது பேசிய அவர், “டெல்லி மற்றும் பஞ்சாபில் ஆம் ஆத்மி அரசுகளை கவிழ்க்க பாஜக போட்ட திட்டம் படுதோல்வி அடைந்தது. டெல்லி, பஞ்சாப் அரசுகளை அவர்களால் கவிழ்க்க முடியவில்லை. எங்கள் எம்எல்ஏக்களை அவர்களால் உடைக்க முடியவில்லை. அவர்களின் முழு திட்டமும் தோல்வியடைந்தது.
திகார் சிறையில், உங்களைப் பற்றியெல்லாம் கேள்விப்பட்டுக் கொண்டே இருந்தேன். சிறைக்குள் இருக்கும் ஊழியர்கள் மற்றும் பாதுகாவலர்களிடம் பேசிக் கொண்டிருந்தேன். ஒவ்வொரு எம்.எல்.ஏ. பற்றியும் எனக்கு அப்டேட் கொடுத்தார்கள். நான் இல்லாதது உங்கள் பணிக்கு இடையூறாக இருக்குமோ என்று கவலைப்பட்டேன். ஆனால் நீங்கள் அனைவரும் சிறப்பாக வேலை செய்திருக்கிறீர்கள்.
சுனிதா கேஜ்ரிவால், டெல்லி அமைச்சர்கள் சௌரப் பரத்வாஜ், அதிஷி, பஞ்சாப் முதல்வர் பகவந்த் மான் ஆகியோர் தன்னைச் சந்திக்க வருவார்கள். அவர்களிடம் டெல்லியில் நடக்கும் பல்வேறு பணிகள் குறித்து விசாரிப்பேன்” என்று அவர் கூறினார்
தொடர்ந்து பேசிய அவர், “நான் கைது செய்யப்படுவதற்கு முன்பு, பாஜக உறுப்பினர்கள் என்னைச் சந்தித்தனர். நான் கைது செய்யப்பட்ட பிறகு, எங்கள் கட்சியை உடைத்து, டெல்லி, பஞ்சாபில் ஆட்சியைக் கவிழ்த்து, ஆம் ஆத்மி எம்.எல்.ஏ.க்கள் மற்றும் பகவந்த் மான் ஆகியோரை அவர்களுடன் அழைத்துச் செல்வோம் என்று அவர்கள் என்னிடம் சொன்னார்கள். ஆனால் அது மாறியது. நான் கைது செய்யப்பட்ட பிறகு, எங்கள் கட்சி மிகவும் வலுவாக ஒன்றிணைந்தது. உறுப்பினர்கள் ஒன்றாக நின்றதால் கட்சியை சிதைக்க முடியவில்லை.
இதற்கு உங்கள் அனைவருக்கும் மிகப்பெரிய வாழ்த்துக்கள். அவர்கள் உங்களைத் தொடர்பு கொண்டு, சாத்தியமான எல்லா வகையிலும் உங்களை உடைக்க முயன்றார்கள் என்பதை நான் அறிந்தேன். ஆனால் நீங்கள் அனைவரும் உறுதியாக இருந்தீர்கள். ஜூன் 2 ஆம் தேதி நான் மீண்டும் சிறைக்கு செல்ல வேண்டும். நான் மீண்டும் சிறையில் அடைக்கப்பட்டவுடன் கட்சியை அனைவரும் கவனித்துக் கொள்ள வேண்டும்” என்று அவர் கூறினார்.
கலால் கொள்கை முறைகேடு வழக்கில் திகார் சிறையில் அடைக்கப்பட்டிருந்த டெல்லி முதல்வர் அர்விந்த் கேஜ்ரிவால், ஜூன் 1 வரை இடைக்கால ஜாமீனில் வெளியில் வந்துள்ளார்.