பாஜக எப்போதும் தொடர்ந்து அதிகாரத்தில் இருக்கலாம் என்று நம்புகிறது, ஆனால் அப்படி இல்லை: ராகுல் காந்தி அதிரடி

பாஜக இந்தியாவில் நித்தியமாக அதிகாரத்தில் இருக்கும் என்று நம்புகிறது, ஆனால் அப்படி இல்லை. இந்திய ஜனநாயகத்திற்கு செய்ய வேண்டிய பழுதுபார்க்கும் பணியை மேற்கொள்ள எதிர்க்கட்சிகளை ஒன்றிணைக்க முடியும் என்று காங்கிரஸ் எம்.பி ராகுல் காந்தி தெரிவித்துள்ளார்.

நேற்று மாலை லண்டனில் உள்ள சாதம் ஹவுஸ் திங்க் டேங்கில் தனது ஒரு உரையாடல் அமர்வில் பேசிய ராகுல் காந்தி, " இந்தியாவில் மாற்றுக் கருத்துக்களை அமைதியாக்க பாஜக முயற்சிக்கிறது. சுதந்திரத்திலிருந்து இப்போது வரை பார்த்தால், காங்கிரஸ் கட்சி பெரும்பான்மையாக ஆட்சியில் இருந்துள்ளது. பாஜக 10 ஆண்டுகளாக ஆட்சியில் இருப்பதற்கு முன்பு, நாங்கள் 10 ஆண்டுகள் ஆட்சியில் இருந்தோம். பாஜக இப்போது நித்தியமாக ஆட்சியில் இருக்கப் போவதாக நம்புகிறார்கள் , அது அப்படி இல்லை. முதலில் நாங்கள் கிராமப்புற இடத்தில் நிறைய கவனம் செலுத்திக் கொண்டிருந்தோம், நகர்ப்புறத்தில் ஆரம்பத்தில் கவனத்தை தவறவிட்டோம், அது ஒரு உண்மை. ஆனால் பாஜக ஆட்சியில் உள்ளது, காங்கிரஸ் போய்விட்டது என்று சொல்வது உண்மையில் ஒரு அபத்தமான சிந்தனை” என்று அவர் கூறினார்.

தனது சாதம் ஹவுஸ் கலந்துரையாடலின் போது, காங்கிரஸைத் தவிர, வெளிநாட்டு ஊடகங்களும், இந்திய ஜனநாயகம் கடுமையான பிரச்சினையில் இருப்பதை எடுத்துக்காட்டுகின்றன என்று சுட்டிக்காட்டினார். அவர், "பாஜக உரையாடலில் ஆர்வம் காட்டவில்லை. என்ன நடக்கிறது என்று எங்களுக்குத் தெரியும், நாட்டில் வேறு யாருக்கும் என்ன நடக்கிறது என்று தெரியாது என்று அவர்கள் முடிவு செய்துள்ளனர், எனது தொலைபேசியில் பெகாசஸ் இருந்தது, நாங்கள் ஆட்சியில் இருந்தபோது அது நடக்கவில்லை. எனவே அனைவருக்கும் மிகவும் வெளிப்படையாக செயல்பட்டனர் ” என்று கூறினார்.

சாதம் மாளிகையில் தனது உரையில், ஆர்.எஸ்.எஸ் ஒரு "அடிப்படைவாத, பாசிச அமைப்பு" என்றும் ராகுல் காந்தி தாக்கினார். அவர், "ஆர்.எஸ்.எஸ்ஸை நீங்கள் இதை ஒரு ரகசிய சமூகம் என்று அழைக்கலாம். இது ஜனநாயக போட்டியைப் பயன்படுத்தி ஆட்சிக்கு வந்து பின்னர் ஜனநாயக போட்டியைத் தகர்த்தெறிய வேண்டும் என்ற நோக்கம் கொண்டது. நாட்டில் உள்ள அமைப்புகளை கைப்பற்றுவதில் அவர்கள் எவ்வளவு வெற்றிகரமாக இருந்தார்கள் என்பது என்னை அதிர்ச்சிக்குள்ளாக்கியுள்ளது. பத்திரிகைகள், நீதித்துறை, பாராளுமன்றம், தேர்தல் ஆணையம் அனைத்து நிறுவனங்களும் இப்போது அழுத்தத்திற்கு உள்ளாகின்றன, அச்சுறுத்தலுக்கு உள்ளாகின்றன, ஒரு வழியில் அல்லது வேறு வழியில் கட்டுப்படுத்தப்படுகின்றன” என தெரிவித்துள்ளார். இதற்கும் பாஜக தனது கண்டனங்களை தெரிவித்து வருகிறது.

முன்னதாக ராகுல் காந்தியின் கருத்துக்களுக்கு பதிலடி கொடுத்த மத்திய தகவல் ஒளிபரப்புத்துறை அமைச்சர் அனுராக் தாக்கூர், "லண்டனில் தேசத்தை காட்டிக் கொடுக்க வேண்டாம் என்று காங்கிரஸ் தலைவரிடம் கேட்டுக்கொள்கிறோம். இந்தியாவுக்கு துரோகம் செய்யாதீர்கள் ராகுல் காந்தி ஜி. வெளிநாட்டு மண்ணிலிருந்து இந்தியாவைப் பற்றி நீங்கள் பரப்பிய பொய்களை யாரும் நம்ப மாட்டார்கள்” என்று செய்தியாளர்களிடம் கூறினார்.