குற்றவாளி என அறிவிக்கப்பட்ட பெண் தாசில்தாருக்கு நீதிபதிகள் அளித்த தண்டனை என்ன தெரியுமா?

குற்றவாளி என அறிவிக்கப்பட்ட பெண் தாசில்தாருக்கு நீதிபதிகள் அளித்த தண்டனை என்ன தெரியுமா?

நீதிமன்ற அவமதிப்பு வழக்கில் பெண் தாசில்தார் நேரில் ஆஜராகி மன்னிப்பு கோரியதை ஏற்ற சென்னை உயர் நீதிமன்ற தலைமை நீதிபதி அமர்வு, இன்று மாலை வரை அவர் நீதிமன்றத்தில் இருக்க வேண்டும் என நூதன தண்டனை வழங்கி உத்தரவிட்டனர்.

திருவண்ணாமலை மாவட்டம், கலசப்பாக்கம் தாலுகா, கடலடி கிராமத்தில் பொதுப்பாதை ஆக்கிரமிப்பு அகற்றக் கோரி முருகன் என்பவர் தொடர்ந்த வழக்கில், 12 வாரங்களில் மனுதாரரின் கோரிக்கையை பரிசீலித்து தகுந்த உத்தரவை பிறப்பிக்க கடந்த 2017 டிசம்பரில் உயர் நீதிமன்றம் உத்தரவு பிறப்பித்து இருந்தது.

இந்த உத்தரவை அமல்படுத்தவில்லை என்று கூறி முருகன் தரப்பில் 2018-ல் தாக்கல் செய்யப்பட்ட நீதிமன்ற அவமதிப்பு வழக்கை விசாரித்த தலைமை நீதிபதி முனீஷ்வர்நாத் பண்டாரி அமர்வு, நீதிமன்ற உத்தரவை வேண்டுமென்றே அமல்படுத்தாத சம்பந்தப்பட்ட தாசில்தாரை குற்றவாளி என அறிவித்தது. தண்டனை விவரம் அறிவிப்பதற்காக அவரை இன்று நேரில் ஆஜராகவும் உத்தரவிட்டிருந்தது.

இந்த உத்தரப்படி இன்று நேரில் ஆஜரான பெண் தாசில்தார் லலிதா, நீதிபதிகளிடம் நிபந்தனையற்ற மன்னிப்பு கோரினார். மேலும், ஆக்கிரமிப்பை 3 வாரங்களில் அகற்றுவதாக அரசு தரப்பிலும் உறுதியளிக்கப்பட்டது. இதனை ஏற்றுக்கொண்ட நீதிபதிகள், பெண் தாசில்தாரருக்கு கடுமையான தண்டனை விதிக்காமல் இன்று மாலை நீதிமன்ற நேரம் முடியும் வரை பெண் தாசில்தார் நீதிமன்றத்தில் இருக்க வேண்டும் என்று நூதன தண்டனை வழங்கி உத்தரவிட்டனர். மேலும் மூன்று வாரங்களில் ஆக்கிரமிப்பை அகற்றி அறிக்கை தாக்கல் செய்யும்படி அரசுத் தரப்புக்கும் நீதிபதிகள் ஆணை பிறப்பித்தனர்.

Related Stories

No stories found.
x
காமதேனு
kamadenu.hindutamil.in