`பணியில் திருப்தி இல்லை எனில் பதவி நீக்கம் தான்'- தற்காலிக நியமன ஆசிரியர்களுக்கு எச்சரிக்கை

`பணியில் திருப்தி இல்லை எனில் பதவி நீக்கம் தான்'- தற்காலிக நியமன ஆசிரியர்களுக்கு எச்சரிக்கை

தற்காலிக ஆசிரியர் பணி நியமனத்திற்கு புதிய வழிகாட்டுதல்களை தமிழக பள்ளிக் கல்வித்துறை இன்று வெளியிட்டுள்ளது.

தமிழக பள்ளிக் கல்வித் துறையில் தற்காலிக ஆசிரியர் பணி நியமனத்திற்கு பல்வேறு தரப்பினரும் எதிர்ப்பு தெரிவித்து வந்தனர். இந்நிலையில் தமிழகத்தில் ஆசிரியர் தகுதித் தேர்வில் வெற்றி பெற்றோர் சங்கத் தலைவர் ஷீலா பிரேம்குமாரி, உயர் நீதிமன்ற கிளையில் தற்காலிக ஆசிரியர்கள் நியமனம் செய்வது தொடர்பான மனு ஒன்றைத் தாக்கல் செய்திருந்தார். நேற்று நடைபெற்ற இந்த வழக்கு விசாரணையில் தமிழக அரசின் தற்காலிக ஆசிரியர்கள் நியமனம் தொடர்பான அறிவிப்புக்கு இடைக்காலத் தடை விதிக்கப்பட்டது. 'முறையற்ற முறையில் நடைபெறும் தற்காலிக ஆசிரியர்கள் நியமனத்தால் தகுதியற்றவர்கள் ஆசிரியர் பணியில் சேரும் வாய்ப்புள்ளது. எனவே, தமிழக அரசின் தற்காலிக ஆசிரியர்கள் நியமனம் தொடர்பான அறிவிப்புக்கு இடைக்காலத் தடை விதிக்கப்படுகிறது' என்று நீதிபதி தனது உத்தரவில் தெரிவித்துள்ளார்.

இந்நிலையில் தற்காலிக ஆசிரியர்களுக்கான தகுதிகளை பள்ளிக் கல்வித் துறை வெளியிட்டுள்ளது. அதில், “ஆசிரியர் தகுதித் தேர்வில் தேர்ச்சி பெற்றவர்கள், இல்லம் தேடிக் கல்வித் திட்டத்தில் தன்னார்வலர்களாக பணியாற்றி வருபவர்கள், முதுகலை பட்டதாரி ஆசிரியர் பணிக்கு ஆசிரியர் தேர்வு வாரியத்தால் நடத்தப்பட்ட சான்றிதழ் சரிபார்ப்பில் கலந்துகொண்டவர்கள், பள்ளிக்கு அருகே வசிப்பவர்கள், மாவட்டத்துக்குள் வசிப்பவர்கள் ஆகிய தகுதிகளின் அடிப்படையில் முன்னுரிமை வழங்கி பணி நியமனம் மேற்கொள்ள வேண்டும்.

காலிப் பணியிடங்களின் விவரங்கள் அனைத்தையும் அந்தந்த பள்ளி வாரியாக அறிவிப்புப் பலகையில் இன்று வெளியிட வேண்டும். தகுதி வாய்ந்த விண்ணப்பதாரர்கள் வரும் 4-ம் தேதி முதல் 6-ம் தேதி மாலை 5 மணி வரை விண்ணப்பிக்க வேண்டும். சரிபார்க்கப்பட்ட விண்ணப்பங்கள் அனைத்தையும் 6-ம் தேதி இரவு 8 மணிக்குள் பள்ளிக்கல்வித்துறை ஆணையருக்கு அனுப்பி வைக்க வேண்டும்” எனத் தெரிவிக்கப்பட்டுள்ளது. மேலும், ஏற்கெனவே மேற்கொள்ளப்பட்ட நியமனங்கள் அனைத்தும் ரத்து செய்யப்பட்டுள்ளது என்றும் ஆசிரியரின் பணி திருப்தி அளிக்கவில்லை எனில், உடனடியாக பணியிலிருந்து விடுவிக்கப்படுவார்கள் என்றும் அறிவிக்கப்பட்டுள்ளது.

Related Stories

No stories found.
x
காமதேனு
kamadenu.hindutamil.in