எம்ஜிஎம் குழும நிறுவனத்தின் மீது தனியார் வங்கி போலீஸில் புகார்: அந்நியச் செலாவணி மோசடியில் ஈடுபட்டதாக குற்றச்சாட்டு!

எம்ஜிஎம் குழும நிறுவனத்தின் மீது தனியார் வங்கி போலீஸில் புகார்:  அந்நியச் செலாவணி மோசடியில் ஈடுபட்டதாக குற்றச்சாட்டு!
எம்.ஜி.எம்.மாறன்.

வருமானவரித்துறை அதிகாரிகள் சோதனை நடத்தி வரும் எம்ஜிஎம் குழும நிறுவனத்தின் மீது காவல்துறையில் தனியார் வங்கி புகார் கொடுத்த விவகாரம் பரபரப்பை ஏற்படுத்தியுள்ளது.

வரிஏய்ப்பு புகாரின் அடிப்படையில் எம்ஜிஎம் குழுமத்திற்கு சொந்தமான இடங்களில் இரண்டாவது நாளாக வருமான வரித்துறை அதிகாரிகள் சோதனை நடத்தி வருகின்றனர்.

இதற்கு முன்னதாக எம்.ஜி.எம் குழுமத்தின் நிர்வாகி எம்.ஜி.எம் மாறன் (எ) நேசமணி மாறன், தமிழ்நாடு மெர்க்கன்டைல் வங்கியின் தலைவராக இருந்த போது அதன் பெரும்பாலான பங்குகளை வெளிநாடுகளுக்கு விற்று முறைகேடு செய்ததாக ரிசர்வ் வங்கி அளித்த புகாரின் அடிப்படையில், அமலாக்கத் துறையினர் எம்.ஜி.எம் மாறன் (எ) நேசமணி மாறன் மீது வழக்குப்பதிவு செய்து விசாரணை நடத்தினர். அப்போது, அவர் சிங்கப்பூரில் உள்ள தனது இரு நிறுவனங்களின் பெயரில் பல கோடி ரூபாய் முதலீடு செய்தது கண்டுபிடிக்கப்பட்டது.

அதன் தொடர்ச்சியாக எம்.ஜி.எம் மாறனுக்கு 35 கோடி ரூபாய் அபராதம் விதித்ததுடன் அவரது 500 கோடி ரூபாய் சொத்துக்களையும் முடக்கி அமலாக்கத்துறையினர் நடவடிக்கை மேற்கொண்டனர். மேலும் எம்ஜிஎம் குழுமம் கணக்கு வைத்துள்ள வங்கிகளிடம் வரவு, செலவு கணக்குகளை உரிய ஆவணங்களுடன் சமர்ப்பிக்குமாறு அமலாக்கத்துறை சார்பில் கடிதம் அனுப்பப்பட்டு விசாரணையானது தொடர்ந்து நடைபெற்று வருகிறது.

இந்நிலையில் சென்னை வேப்பேரி காவல் ஆணையர் அலுவலகத்தில் இன்று பிரபல தனியார் வங்கியின் (ஆக்சிஸ் வங்கி) துணைத் தலைவர் கோபிகிருஷ்ணன் புகார் மனு அளித்தார். அதில், எம்ஜிஎம் குழுமத்தின் நிறுவனங்களில் ஒன்றான எஸ்.ஏ.எஃப்.எல் நிறுவனம் தங்களது வங்கி பெயரில் முறைகேட்டில் ஈடுபட்டுள்ளதாகவும், அவர்கள் மீது உரிய நடவடிக்கை வேண்டும் என குறிப்பிட்டுள்ளார்.
மேலும் சென்னை அண்ணா சாலையில் இயங்கி வரும் தங்களது வங்கி கிளையில் கடந்த 2007-ம் ஆண்டு முதல் எம்ஜிஎம் குழும நிறுவனமான எஸ்.ஏ.எஃப் எல் நிறுவனம், மற்றும் சிங்கப்பூரில் உள்ள இரு கிளை நிறுவனங்கள், யூ.கே-வில் இயங்கும் ஒரு கிளை நிறுவனம், என 3 நிறுவனங்கள் பெயரில் 3 வங்கிக் கணக்குகளைத் தொடங்கி, தங்கள் வங்கியில் பல்வேறு சலுகைகளைப் பெற்று வருவதாக தெரிவித்துள்ளார்.


சென்னை ஆர்.கே சாலையில் இந்நிறுவனத்தின் கார்ப்பரேட் அலுவலகம் இயங்கி வரும் நிலையில், கடந்த 2010-ம் ஆண்டு முதல் நேரடியாக அந்நிய செலாவணி முதலீட்டில் எஸ்.ஏ.எஃப்.எல் நிறுவனம் ஈடுபட்டு வருவதாகவும், இந்த நிறுவனத்தின் பணப் பரிவர்த்தனைகள் தங்கள் வங்கியின் மூலம் நடைபெறுவதாகவும் புகாரில் தெரிவிக்கப்பட்டுள்ளது. மேலும், எஸ்.ஏ.எஃப்.எல் நிறுவனம் தங்கள் வங்கியில் கணக்கு வைத்துள்ளதால் ஒரு வழக்கு தொடர்பாக அந்நிறுவனத்தின் வரவு-செலவு கணக்குகளை ஆவணங்களுடன் சமர்பிக்க தங்களுக்கு அமலாக்கத்துறை கடிதம் அனுப்பியதாகவும், அதனடிப்படையில் எஸ்.ஏ.எஃப்.எல் நிறுவனம் தங்கள் வங்கி மூலம் சிங்கப்பூர் உள்ளிட்ட வெளிநாடுகளில் முதலீடு செய்தது, மற்றும் பணப் பரிவர்த்தனை தொடர்பான கணக்கு வழக்கு, அதற்கான ஆவணங்கள் ஆகியவற்றை அமலாக்கத்துறைக்கு அனுப்பியதாகவும், அப்போது தான் குறிப்பிட்ட 2 பண பரிவர்த்தனைகளை எஸ்.ஏ.எஃப்.எல் நிறுவனம் தங்கள் வங்கியிடம் உரிய ஆவணங்களை சமர்ப்பிக்காமல், முறைகேடாக பணப்பரிவர்தனை செய்திருந்தது கண்டுபிடிக்கப்பட்டதாக புகாரில் குறிப்பிடப்பட்டுள்ளது.

கடந்த 2020 டிசம்பர் ,2021 ஜனவரி ஆகிய மாதத்தில் 2 பணப்பரிவர்த்தனைகளை எஸ்.ஏ.எஃப்.எல் நிறுவனம் தங்கள் வங்கி பெயரில் மோசடியாக நிகழ்த்தியது கண்டறியப்பட்டதாகவும், இதுபோன்ற அந்நிய செலாவணி முதலீடுகளில் பணப்பரிவர்த்தனை மேற்கொள்வதற்கு ரிசர்வ் வங்கி மூலம் உரிய வழிகாட்டுதல்கள் வழங்கப்பட்டுள்ளதாகவும், அதன்படி பணப்பரிவர்த்தனை அந்நிய முதலீடாக இருக்கும் பட்சத்தில் உரிய ஆவணங்களை சமர்ப்பிப்பதற்கும், அதன் மூலம் பரிவர்த்தனையை சட்டரீதியாக எடுத்துச் செல்வதற்கும் தங்கள் வங்கி வழிவகைகள் செய்துள்ளதாகவும், இந்த வழிவகைகளை தவறாக பயன்படுத்தி தங்கள் வங்கிக்கே தெரியாமல் எஸ்.ஏ.எஃப்.எல் நிறுவனம் 2 பணப் பரிவர்த்தனைகளை மோசடி வழியில் நடத்தியுள்ளதால் அவர்கள் வழக்குப் பதிவு செய்து உரிய நடவடிக்கை எடுக்க வேண்டும் என வங்கி சார்பில் அளிக்கப்பட்டுள்ள புகாரில் குறிப்பிடப்பட்டுள்ளது.

ஏற்கனவே எம்ஜிஎம் குழுமம் பல்வேறு சர்ச்சையில் சிக்கியுள்ள நிலையில் தற்போது தனியார் வங்கி ஒன்று எம்ஜிஎம் குழுமத்தின் மீது புகார் அளித்துள்ளது தொழில் நிறுவனங்கள் மத்தியில் பெரும் பரபரப்பை ஏற்படுத்தியுள்ளது.

Related Stories

No stories found.
x
காமதேனு
kamadenu.hindutamil.in