உலகில் கடந்த 20 ஆண்டுகளில் தாய் இறப்பு விகிதம் மூன்றில் ஒரு பங்கு குறைந்தாலும், கர்ப்பம் மற்றும் பிரசவ சிக்கல்கள் காரணமாக ஒவ்வொரு இரண்டு நிமிடங்களுக்கும் ஒரு பெண் இறக்கிறார் என்று ஐக்கிய நாடுகள் சபை தெரிவித்துள்ளது.
தாய் இறப்பு விகிதம் 2000 மற்றும் 2015 க்கு இடையில் கணிசமாகக் குறைந்தன, ஆனால் 2016 மற்றும் 2020 க்கு இடையில் இது பெரும்பாலும் தேக்கமடைந்துள்ளன. மேலும், சில பிராந்தியங்களில் இது தலைகீழாக மாறியுள்ளது என்று ஐ.நா தெரிவித்துள்ளது.
20 வருட காலப்பகுதியில் ஒட்டுமொத்த தாய் இறப்பு விகிதம் 34.3 சதவீதம் குறைந்துள்ளது. 2000ம் ஆண்டில் 1,00,000 பிரசவங்களில் 339 மகப்பேறு இறப்புகள் பதிவானது. இது 2020ல் 223 மகப்பேறு இறப்புகளாக குறைந்துள்ளது என உலக சுகாதார அமைப்பு தெரிவித்துள்ளது
ஆயினும்கூட, 2020ல் பிரசவத்தின் போது ஒரு நாளைக்கு கிட்டத்தட்ட 800 பெண்கள் இறக்கின்றனர். அதாவது ஒவ்வொரு இரண்டு நிமிடங்களுக்கும் ஒரு பெண் இறக்கிறார். 2000 மற்றும் 2015 க்கு இடையில், அமெரிக்காவில் இந்த விகிதத்தில் மிகப்பெரிய உயர்வு இருந்தது.
"கர்ப்பமானது மகத்தான நம்பிக்கையின் நேரமாகவும், அனைத்து பெண்களுக்கும் ஒரு நேர்மறையான அனுபவமாகவும் இருக்க வேண்டும் என்றாலும், உலகெங்கிலும் உள்ள மில்லியன் கணக்கானவர்களுக்கு இது ஒரு அதிர்ச்சியூட்டும் ஆபத்தான அனுபவமாக உள்ளது" என்று உலக சுகாதார நிறுவனத்தின் தலைவர் டெட்ராஸ் அதானம் கூறினார். அவர், "இந்தப் புதிய புள்ளிவிவரங்கள், ஒவ்வொரு பெண்ணும் முக்கியமான சுகாதாரச் சேவைகளை அணுகுவதை உறுதிப்படுத்த வேண்டிய அவசரத் தேவையை வெளிப்படுத்துகின்றன" என கூறினார்.
2016 மற்றும் 2020 க்கு இடையில், மகப்பேறு இறப்பு விகிதம் ஐநாவின் எட்டு பிராந்தியங்களில், இரண்டில் மட்டுமே குறைந்துள்ளது. இது ஆஸ்திரேலியா மற்றும் நியூசிலாந்தில் 35 சதவிகிதம், மத்திய மற்றும் தெற்கு ஆசியாவில் 16 சதவிகிதம் குறைந்துள்ளது.
இந்த விகிதம் ஐரோப்பா மற்றும் வட அமெரிக்காவில் 17 சதவீதமும், லத்தீன் அமெரிக்கா மற்றும் கரீபியன் நாடுகளில் 15 சதவீதமும் அதிகரித்துள்ளது. மற்ற இடங்களில் தேக்கமடைந்தது.கிரீஸ் மற்றும் சைப்ரஸ் ஆகிய இரண்டு ஐரோப்பிய நாடுகள் "குறிப்பிடத்தக்க அதிகரிப்பை" கண்டுள்ளன.
மகப்பேறு இறப்புகள் பெரும்பாலும் உலகின் ஏழ்மையான பகுதிகளிலும், மோதலால் பாதிக்கப்பட்ட நாடுகளிலும் அதிகமாக உள்ளன.
2020 இல் பதிவு செய்யப்பட்ட இறப்புகளில் 70 சதவீதம் துணை-சஹாரா ஆப்பிரிக்காவில் இருந்தன. அங்கு மகப்பேறு இறப்பு விகிதம் ஆஸ்திரேலியா மற்றும் நியூசிலாந்தை விட 136 மடங்கு அதிகமாகும்.
ஆப்கானிஸ்தான், மத்திய ஆப்பிரிக்க குடியரசு, சாட், காங்கோ ஜனநாயகக் குடியரசு, சோமாலியா, தெற்கு சூடான், சூடான், சிரியா மற்றும் ஏமன் போன்ற நாடுகளில் மகப்பேறு இறப்பு விகிதங்கள் உலக சராசரியை விட இரண்டு மடங்கு அதிகமாகும்.