![இந்திய கிரிக்கெட் அணி](http://media.assettype.com/kamadenu%2F2023-03%2Fdce450f2-e00c-46af-b00b-f6f201e934e4%2Findia_one_day_team.jpg?w=480&auto=format%2Ccompress&fit=max)
சென்னை சேப்பாக்கம் மைதானத்தில் இந்தியா- ஆஸ்திரேலியா அணிகள் மோதும் மூன்றாவது ஒருநாள் கிரிக்கெட் போட்டிக்கான டிக்கெட்கள் 4 மணி நேரத்தில் விற்றுத் தீர்ந்தது.
ஆஸ்திரேலியா கிரிக்கெட் அணி இந்தியாவில் சுற்றுப்பயணம் செய்து டெஸ்ட் மற்றும் ஒரு நாள் போட்டிகளில் விளையாடி வருகிறது. டெஸ்ட் தொடரை 2-1 என்ற கணக்கில் இந்திய அணி கைப்பற்றியது. இதையடுத்து, இரு அணிகளுக்கு இடையேயான ஒருநாள் கிரிக்கெட் போட்டி கடந்த 17-ம் தேதி தொடங்கியது. இதில் இந்திய அணி 5 விக்கெட் வித்தியாசத்தில் வெற்றி பெற்றது. நாளை இரு அணிகளுக்கு இடையேயான இரண்டாவது ஒருநாள் கிரிக்கெட் போட்டி விசாகப்பட்டினத்தில் தொடங்குகிறது. இதையடுத்து மூன்றாவது மற்றும் கடைசி ஒரு நாள் போட்டி சென்னை சேப்பாக்கம் மைதானத்தில் வரும் 22-ம் தேதி தொடங்குகிறது.
இந்த போட்டிக்கான டிக்கெட் விற்பனை சேப்பாக்கம் மைதானத்தில் இன்று தொடங்கியது. டிக்கெட் வாங்க நேற்று முதல் ரசிகர்கள் நீண்ட வரிசையில் காத்து இருந்தனர். இந்த நிலையில் டிக்கெட் விற்பனை இன்று காலை தொடங்கியதும், 5,100 டிக்கெட்டுகள் 4 மணி நேரத்தில் விற்றுத் தீர்ந்துவிட்டன. ஏற்கெனவே ஆன்லைனில் 30 ஆயிரம் டிக்கெட்டுகள் விற்பனையாகிவிட்டன. நீண்ட நாட்களுக்குப் பிறகு சென்னை சேப்பாக்கம் மைதானத்தில் சர்வதேச கிரிக்கெட் போட்டி நடைபெற உள்ளதால் ரசிகர்கள் இந்த போட்டியை பார்க்க மிகுந்த ஆர்வம் காட்டி வருகின்றனர்.