சண்டிகரில் உள்ள தனியார் பல்கலைக்கழகத்தின் தங்கும் விடுதியைச் சேர்ந்த மாணவிகள் குளியலறையில் குளிக்கும் வீடியோக்கள் இணையத்தில் கசிந்ததாகப் பரவிய செய்தி பெரும் பரபரப்பை ஏற்படுத்தியிருக்கிறது.
இந்த விடுதியில் தங்கியிருக்கும் மாணவி ஒருவர் தனது ஆண் நண்பருடன் எடுத்துக்கொண்ட புகைப்படங்களையும் வீடியோக்களையும் சமூகவலைதளத்தில் பகிர்ந்துகொண்டதாகக் கூறப்படுகிறது. ஆனால், அந்த மாணவி பிற மாணவிகளின் புகைப்படங்கள் மற்றும் வீடியோக்களையும் பகிர்ந்துகொண்டதாகப் புகார் எழுந்திருக்கிறது. குளியலறையில் ரகசியக் கேமரா வைத்து சக மாணவிகள் குளிக்கும் காட்சிகளைப் பதிவுசெய்து இணையத்தில் பரப்பியதாக அவர் மீது பல மாணவிகள் குற்றம்சாட்டியிருக்கின்றனர். இதையடுத்து சம்பந்தப்பட்ட மாணவியைப் பிடித்து போலீஸார் விசாரித்துவருகின்றனர்.
இதற்கிடையே, வீடியோக்கள் வெளியானதால் ஏராளமான மாணவிகள் தற்கொலைக்கு முயன்றதாகத் தகவல்கள் பரவின. எனினும், அது வதந்தி எனப் பல்கலைக்கழக நிர்வாகமும் போலீஸாரும் விளக்கமளித்தனர். மயக்கமடைந்த ஒரு மாணவி மட்டும் மருத்துவமனையில் சிகிச்சை பெற்றுவருவதாகவும் அவரது உடல்நிலை சீராக இருப்பதாகவும் பல்கலைக்கழக நிர்வாகிகள் கூறியிருக்கின்றனர்.
ஏராளமான மாணவர்கள் இந்தச் சம்பவத்தைக் கண்டித்து போராட்டத்தில் ஈடுபட்டிருக்கிறார்கள்.
இதையடுத்து, பல்கலைக்கழக மாணவர்கள் அமைதி காக்க வேண்டும் என்று பஞ்சாப் பள்ளிக் கல்வித் துறை அமைச்சர் ஹர்ஜோத் சிங் பெய்ன்ஸ் வேண்டுகோள் விடுத்திருக்கிறார். இதுதொடர்பான செய்திகளை வெளியிடும் ஊடகங்கள் பொறுப்புணர்வுடன் செயல்பட வேண்டும் என்றும் அவர் வலியுறுத்தியிருக்கிறார்.
இது தொடர்பாக சைபர் க்ரைம் போலீஸார் தொடர் விசாரணையில் ஈடுபட்டிருக்கின்றனர். விரைவில் இது குறித்து வழக்கு பதிவுசெய்யப்படும் என எதிர்பார்க்கப்படுகிறது.