அதிக வட்டி தருகிறேன்... ஆசைவார்த்தை கூறி பல கோடி 'அபேஸ்': கம்பி எண்ணும் நிதி நிறுவன உரிமையாளர்!

அதிக வட்டி தருகிறேன்... ஆசைவார்த்தை கூறி பல கோடி 'அபேஸ்': கம்பி எண்ணும் நிதி நிறுவன உரிமையாளர்!
கைதான முத்துச்சாமி

அதிக வட்டி தருவதாக கூறி பலரிடம் ரூ.17 கோடிக்கு மேலாக ஏமாற்றிய நிதி நிறுவன உரிமையாளரை தேனி மாவட்ட குற்றப்பிரிவு காவல்துறையினர் கைது செய்து சிறையில் அடைத்தனர்.

திண்டுக்கல் மாவட்டம், ரெட்டியார்சத்திரத்தைச் சேர்ந்த முத்துக்காளை மகன் முத்துச்சாமி கோவை மாவட்டத்தை தலைமையிடமாக கொண்டு கடந்த 2020-ம் ஆண்டு தனியார் நிதி நிறுவனத்தை தொடங்கி உள்ளார். தேனி உள்ளிட்ட தமிழகத்தின் பல மாவட்டங்களில் இதற்கு கிளைகள் உள்ளன. இந்த நிறுவனத்தில் முதலீடு செய்பவர்களுக்கு மாதம் தோறும் 10% வட்டி தருவதாக கூறி உள்ளனர்.

இதனை நம்பி தேனி மாவட்டத்தில் இருந்து பலரும் முதலீடு செய்துள்ளனர். இந்நிலையில், தேனி மாவட்டம் கம்பம் மாலையம்மாள்புரத்தைச் சேர்ந்த விவசாயியான சத்தியமூர்த்தி தேனி மாவட்ட காவல் கண்காணிப்பாளர் பிரவீன் உமேஷ் டோங்கரேவிடம் புகார் மனுவை அளித்துள்ளார். அதில், "இந்த நிதி நிறுவனத்தில் முதலீடு செய்யும் முதலீட்டாளர்களுக்கு அதிக வட்டி தருவதாக கூறினர். அந்த ஆசை வார்த்தைகளை நம்பி நான் பல தேதிகளில் மொத்தமாக ரூ.11 லட்சம் முதலீடு செய்தேன்.

மேலும், என்னைப்போல் தேனியைச் சேர்ந்த சிவக்குமார் ரூ. 22 லட்சமும், இந்திரா ரூ. 77 லட்சத்து 50 ஆயிரமும் முதலீடு செய்தனர். நாங்கள் மூன்று பேரும் மொத்தமாக ரூ.1 கோடியே 10 லட்சத்து 50 ஆயிரம் முதலீடு செய்தோம். எங்களைப் போன்று பலரும் இந்த நிதி நிறுவனத்தில் முதலீடு செய்தனர். லாப தொகை என்று கூறி இரண்டு மாதங்கள் மட்டுமே சிறிய அளவில் தொகையை கொடுத்தனர். அதன்பிறகு பணம் எதுவும் கொடுக்கவில்லை.

தொடர்ந்து, தேனியில் நிதி நிறுவன கிளை செயல்பட்ட இடத்திற்கு நேரில் சென்று பார்த்தபோது அது பூட்டப்பட்டிருந்தது. மேலும், விசாரித்து போது பொதுமக்களிடம் வாங்கிய பணத்தை மோசடி செய்துவிட்டு நிறுவனத்தை மூடிவிட்டு சென்றதும் தெரியவந்தது. எனவே, இதுகுறித்து நடவடிக்கை எடுக்க வேண்டும்" என்று கூறி இருந்தார்.

இதேபோல், பலரும் புகார் அளிக்கவே, இதுகுறித்து, நடவடிக்கை எடுக்க மாவட்ட குற்றப்பிரிவு காவல்துறையினருக்கு மாவட்ட காவல் கண்காணிப்பாளர் உத்தரவிட்டார். அதனடிப்படையில், மாவட்ட குற்றப்பிரிவு காவல்துறையினர் விசாரணை நடத்தி முத்துச்சாமி, ஆனந்த் ஆகிய 2 பேர் மீதும் காவல்துறையினர் வழக்கு பதிவு செய்தனர். இதில், முத்துச்சாமி நேற்று காவல்துறையினரால் கைது செய்யப்பட்டு சிறையில் அடைக்கப்பட்டார்.

இது குறித்து காவல்துறை அதிகாரி கூறுகையில், "இந்த நிறுவனத்தின் பெயரில் தமிழகத்தில் சுமார் 800 பேரிடம், முதலீடு செய்வதாக கூறி பணம் பெற்றுள்ளனர். தேனி மாவட்டத்தில் மட்டும் சுமார் ரூ. 4 கோடி வசூலித்து மோசடி செய்துள்ளது தெரியவந்துள்ளது. தமிழகத்தில் மொத்தமாக சுமார் ரூ.17 கோடி வரை பொதுமக்களிடம் இருந்து பணம் பெற்றிருப்பதும் தெரிய வந்துள்ளது. மேலும், இதுதொடர்பாக கூடுதல் விசாரணை நடைபெற்று வருகிறது" என்றார்.

Related Stories

No stories found.
x
காமதேனு
kamadenu.hindutamil.in