வேடசந்தூர் அருகே சிறுமியை நிலா பெண்ணாகத் தேர்வு செய்து கிராமமக்கள் வழிபாடு நடத்தியுள்ளனர்.
திண்டுக்கல் மாவட்டம் வேடசந்தூர் அருகே குட்டம் ஊராட்சி கோட்டூர் கிராமத்தில் ஆண்டுதோறும் தை மாதம் பவுர்ணமி நாளன்று நிலாபெண் வழிபாடு விழா நடைபெறுகிறது. ஒரு வாரத்திற்கு முன்பு ஊர் பெரியவர்கள் அனைவரும் ஒன்று சேர்ந்து கிராமத்தில் வசிக்கும் ஒவ்வொரு குடும்பத்திலும் உள்ள சிறுமிகளின் பெயர்களை எழுதி குலுக்கல் முறையில் நிலாபெண்ணைத் தேர்வு செய்கின்றனர்.
அப்படி தேர்வு செய்யப்படும் சிறுமிக்கு கிராமத்தில் உள்ள பலரும் தங்கள் வீடுகளில் இருந்து பால், பழம் உள்ளிட்ட உணவுகளைக் கோயிலில் வைத்து வழங்குகின்றனர். ஆண்டுதோறும் நடைபெறும் திருவிழா தை பவுர்ணமி நாளான நேற்று முன்தினம் இரவு நடைபெற்றது. நிலாப்பெண்ணாக இந்த ஆண்டு கார்த்திகேயன்- மேகலா தம்பதியின் பத்து வயது மகள் சர்வ அதிர்ஷ்டா என்பவர் தேர்வு செய்யப்பட்டார். அவரை கிராமத்தில் உள்ள மாடச்சி அம்மன் கோயிலுக்குத் தாரை தப்பட்டை முழங்க பெண்கள் அழைத்து வந்தனர். அத்துடன் சிறுமிக்கு ஆவாரம் பூ மாலையிட்டு ஆவாரம் பூக்கள் அடங்கிய கூடையை தலையில் வைத்து கோயில் முன்பு அமர வைத்து இரவு கிராம பெண்கள் பாட்டு பாடி கும்மியடித்து மகிழ்ந்தனர்.
பொங்கல் வைத்து வழிபாடு நடத்தினர். அதிகாலையில் நிலா மறையத் தொடங்கும் நேரத்தில் சிறுமி கொண்டு வந்த ஆவாரம்பூ கூடையில் தீபச்சட்டியை வைத்து தீபம் ஏற்றி அதனை நீர் நிறைந்த கிணற்றில் மிதக்க விட்டு அம்மனை வணங்கி வீடு திரும்பினர்.
இதுகுறித்து கிராமபெண்கள் கூறுகையில், " நிலாபெண் வழிபாடு வழக்கம் எங்கள் கிராமத்தில் பல நூற்றாண்டுகளாக தைப்பூச பவுர்ணமி அன்று இரவில் நடந்துவருகிறது. எங்கள் முன்னோர் சொன்ன வழக்கப்படி நிலாப்பெண் வழிபாட்டை தொடர்ந்து செய்துவருகிறோம். அடுத்த தலைமுறையும் தொடரச்செய்வோம். இந்த விழா கொண்டாடுவதன் மூலம் விவசாயம் செழிக்கும் என்பது எங்களது நம்பிக்கை" என்றார்.