தம்பதியை கடத்திச் சென்ற கும்பல்: பிடிக்க காத்திருந்த போலீஸ்: இரவில் நடந்தது என்ன?

தம்பதியை கடத்திச் சென்ற கும்பல்: பிடிக்க காத்திருந்த போலீஸ்: இரவில் நடந்தது என்ன?

நிலத்தரகர்களான தம்பதியை காரை வழிமறித்து கடத்திச் சென்று  பணம் கேட்டு மிரட்டியதுடன் நகை, பணம் ஆகியவற்றை  கொள்ளையடித்துக் கொண்டு போலீஸாரிடமிருந்து தப்பிச் சென்றுள்ள சம்பவம் மணப்பாறையில் பெரும் பரபரப்பை ஏற்படுத்தியுள்ளது.

திருச்சி மாவட்டம், மணப்பாறை அடுத்த ஆபீசர் டவுன் பகுதியை சேர்ந்தவர் பழனியப்பன் (55). இவரது மனைவி சந்திரா (43). நிலத்தரகர்களான இவர்கள் இருவரும் நேற்று சென்னை பொன்னேரி பகுதியில் நிலம் வாங்குவதற்காக அவர்களது காரில் சென்னை நோக்கி சென்று கொண்டிருந்தனர். அப்பொழுது திருச்சி அருகே அடையாளம் தெரியாத  நபர்கள் இவர்களது காரை வழிமறித்து  இருவரையும் சரமாரியாக தாக்கியுள்ளனர். 

அத்துடன் அவர்கள்  இருவரையும் அவர்களது காரிலேயே ஏற்றிக்கொண்ட  அந்த நபர்கள்,  இடம் வாங்குவதற்காக நீங்கள் எடுத்துச் செல்லும் பணத்தை எங்களிடம் கொடுங்கள் என்று மிரட்டி உள்ளனர். ஆனால் தம்பதியினர் தங்களிடம் எந்த பணமும் இல்லை என்று கூறி இருக்கின்றனர். இதையடுத்து அவர்களது மகன் கலைச்செல்வனிடம்  கூறி பணத்திற்கு ஏற்பாடு செய்யுமாறு மிரட்டி உள்ளனர்.

இதையடுத்து தங்கள் மகன் கலைச்செல்வனிடம் நடந்ததை கூறி பணத்தை ஏற்பாடு செய்யுமாறு தம்பதியினர்  அலைபேசி வழியாக கூறியுள்ளனர்.  பணத்தை  மணப்பாறையில் வந்து வாங்கிக் கொள்ளுமாறு  கலைச்செல்வன் கூறியுள்ளார்.  பின்னர் தாமதிக்காமல் தனது தாய், தந்தை கடத்தப்பட்ட சம்பவம் குறித்து மணப்பாறை காவல்துறையினருக்கு தகவல் அளித்தார். 

உடனடியாக மணப்பாறை காவல் ஆய்வாளர் கோபி தலைமையிலான காவலர்கள் கடத்தல் கும்பலை பிடிக்க ஆண்டவர் கோயில் அருகில் காத்திருந்தனர். பணத்தை வாங்க வந்த கடத்தல்காரர்கள் காவலர்களை கண்டதும் வாகனத்தில் மாற்றுப் பாதையில் தப்பிச் சென்றனர். போலீஸாரும் தொடர்ந்து விரட்டிச் சென்றனர்.  இதையடுத்து, கடத்தல்காரர்கள் நிலத்தரகருக்கு சொந்தமான சொகுசு காரை வையம்பட்டி அருகே நிறுத்திவிட்டு வேறு ஒரு வாகனத்தில் பழனியப்பன், சந்திரா இருவரையும் ஏற்றிக் கொண்டு தப்பினர்.

அவர்களிடமிருந்த 10 சவரன் நகை, 40 ஆயிரம் பணத்தை பறித்துக்கொண்டு காரில் இருந்து திண்டுக்கல் அருகே இறக்கிவிட்டு தப்பிச் சென்றுவிட்டனர். தம்பதியர் இருவரும் அங்கிருந்த நேற்று இரவு மணப்பாறை காவல் நிலையம் வந்தனர். நடந்த விவரங்களை போலீஸாரிடம் தெரிவித்தனர்.

இதனிடையே கலைச்செல்வத்திடம் பணம் வாங்குவதற்காக தோகைமலை அருகே காத்திருந்த துவாக்குடியைச் சேர்ந்த காளிதாஸ் (53) என்பவரை போலீஸார்  மடக்கிப் பிடித்தனர்.  காவல்துறையினர் நடத்திய முதற்கட்ட விசாரணையில், இந்த சம்பவத்தில் தப்பித்தவர்கள்  சிவகங்கை மாவட்டம் தேவகோட்டை, காரைக்குடி, ஆறாவயல் பகுதியைச் சேர்ந்தவர்கள் என்பது தெரியவந்தது. மேலும் பிடிபட்ட காளிதாசிடம் காவல்துறையினர் விசாரணை மேற்கொண்டு வருகின்றனர்.

Related Stories

No stories found.
x
காமதேனு
kamadenu.hindutamil.in