அதிக வட்டி தருவதாக ஆசையைத் தூண்டி 8625 கோடி சுருட்டல்: ஒரே மாதத்தில் 3 நிறுவனங்கள் செய்த மோசடி அம்பலம்

பொருளாதார குற்றபிரிவு எஸ்.பி ஜெயச்சந்திரன், டிஎஸ்பி ரகுபதி, மனிஷா, ஏடிஎஸ்பி வேல்முருகன்.
பொருளாதார குற்றபிரிவு எஸ்.பி ஜெயச்சந்திரன், டிஎஸ்பி ரகுபதி, மனிஷா, ஏடிஎஸ்பி வேல்முருகன்.

தமிழகத்தில் கடந்த ஓரு மாதத்தில் அதிக வட்டி தருவதாக கூறி 3 நிறுவனங்கள் 8625 கோடி ரூபாய் மோசடியில் ஈடுபட்டது கண்டுபிடிக்கப்பட்டுள்ளது. இந்த நிறுவனங்களின் சொத்துக்களை முடக்கி பாதிக்கப்பட்ட முதலீட்டாளர்களுக்கு பணத்தைத் திருப்பி வழங்கும் பணியில் தீவிரமாக செயல்பட்டு வருவதாக பொருளாதார குற்றப்பிரிவு எஸ்.பி ஜெயச்சந்திரன் தெரிவித்துள்ளார்.

தமிழகத்தில் அதிக வட்டி தருவதாக கூறி ஆயிரக்கணக்கான பொது மக்களிடம் முதலீடுகளை பெற்றுக்கொண்டு பல்லாயிரம் கோடி ரூபாய் மோசடி செய்து வந்த நிறுவனங்கள் மீது பொருளாதார குற்றப்பிரிவு போலீஸார் அதிரடியாக வழக்குப் பதிவு செய்து சோதனைகளை நடத்தினர். ஆருத்ரா கோல்ட் டிரேடிங் நிறுவனம் ஒரு லட்ச ரூபாய் முதலீடு செய்தால் மாதம் 30 ஆயிரம் ரூபாய் தருவதாக கூறி சுமார் 90 ஆயிரம் பேரிடம் முதலீடுகளை பெற்று மோசடியில் ஈடுபட்டதை பொருளாதார குற்றப்பிரிவு அதிகாரிகள் கண்டுபிடித்தனர்.

இதனையடுத்து ஆருத்ரா கோல்ட் டிரேடிங் நிறுவன நிர்வாகிகள் 8 பேர் மீது வழக்குப் பதிவு அந்நிறுவனத்திற்குச் சொந்தமான இடங்களில் சோதனை நடத்தி அந்நிறுவனம் சுமார் 2125 கோடி ரூபாய் மோசடி செய்ததைக் கண்டுபிடித்தனர்.

இதேபோன்று வேலூரை தலைமை இடமாக கொண்டு செயல்பட்ட இன்டர்நேஷனல் பைனான்ஸ் சர்வீஸ் என்ற நிறுவனம் , ஒரு லட்ச ரூபாய் முதலீடு செய்தால் மாதம் 8000 ரூபாய் தருவதாக கூறி சுமார் ஒரு லட்சம் பேரிடம் 6000 கோடி அளவிற்கு முதலீடுகளைப் பெற்று மோசடியில் ஈடுபட்டதை அடுத்து, இதன் நிர்வாகிகள் 5 பேர் மீது வழக்குப் பதிவு செய்து அதிகாரிகள் தொடர் விசாரணை மேற்கொண்டு வருகின்றனர்.

இதேபோன்று திருச்சியை தலைமை இடமாகக் கொண்டு செயல்பட்ட எல்பின் என்ற நிறுவனம் 5000 பேரிடம் சுமார் 500 கோடி அளவில் மோசடி செய்த விவகாரத்திலும் வழக்குப் பதிவு செய்து விசாரணை மேற்கொண்டு வருகின்றனர்.

இந்த மூன்று நிறுவனங்கள் நடத்திய மெகா மோசடி குறித்து பொருளாதார குற்றப்பிரிவு எஸ்பி ஜெயச்சந்திரன் இன்று செய்தியாளர்களிடம் கூறுகையில்," இந்த மோசடி நிறுவனங்கள் பான்சி ஸ்கீம் என்ற முறையின் அடிப்படையில் முதற்கட்டமாக குறிப்பிட்ட நபர்களிடம் முதலீடுகளை வசூல் செய்துவிட்டு, அவர்களுக்கு இரண்டாம் கட்டமாக வசூல் செய்யும் நபர்களிடமிருந்து பெறப்பட்ட தொகையை வட்டியாக கொடுத்து மோசடி மேற்கொண்டு வந்தது பொருளாதார குற்றப்பிரிவு அதிகாரிகள் கண்டுபிடித்தனர்.

குறிப்பாக மத்திய அரசின் 2019-ம் ஆண்டு கொண்டுவரப்பட்ட முறைப்படுத்தப்படாத வெளியீடுகள் தடுப்புச் சட்டம் திருத்தம் அடிப்படையில் குறைந்தபட்சம் 5.5 சதவீதத்திலிருந்து அதிகபட்சமாக 12 சதவீதம் வட்டி விகிதங்களை தாண்டி முதலீடுகளைப் பெற்று பொதுமக்களுக்கு வட்டி கொடுக்கும் நிறுவனங்கள் மீது நடவடிக்கை எடுக்கும் வகையில் சட்டத் திருத்தம் கொண்டுவரப்பட்டது.

அதன் அடிப்படையிலும் ரிசர்வ் வங்கி பரிந்துரையின் அடிப்படையிலும் மோசடியில் ஈடுபட்ட ஆருத்ரா கோல்ட் டிரேடிங் நிறுவனம், இன்டர்நேஷனல் பைனான்சியல் சர்வீஸ் ,மற்றும் எல்பின் நிறுவனம் ஆகியவற்றின் மீது நடவடிக்கை மேற்கொள்ளப்பட்டுள்ளது.

இந்த மூன்று நிறுவனங்களும் மொத்தமாக 8265 கோடி ரூபாய் அளவில் பொதுமக்களிடம் பணத்தை வசூல் செய்து மோசடி செய்துள்ளன இந்த பணத்தை மக்களுக்குத் திருப்பிக் கொடுக்கும் நடவடிக்கையில் பொருளாதார குற்றப்பிரிவு அதிகாரிகள் ஈடுபட்டு வருகின்றனர். அதன்படி ஆருத்ரா கோல்ட் டிரேடிங் நிறுவனத்திற்கு சொந்தமான 85 கோடி ரூபாய் பணத்தை முடக்கியதுடன், 150 கோடி ரூபாய் அளவிலான சொத்துக்கள் அடையாளம் கண்டுள்ளோம். எல்பின் இ காம் நிறுவனம் தொடர்பான 100 கோடி ரூபாய் சொத்துக்கள் அடையாளம் கண்டுபிடிக்கப்பட்டுள்ளது.

ஆருத்ரா கோல்ட் டிரேடிங், இன்டர்நேஷனல் பைனான்ஸ் சர்வீஸ், எல்பின் நிறுவனம் தொடர்புடைய வழக்குப் பதிவு செய்யப்பட்டநிர்வாகிகள் சிலர் மீது லுக் அவுட் நோட்டிஸ் கொடுக்கப்பட்டுள்ளது. இதைத் தொடர்ந்து இந்த மூன்று நிறுவனத்தின் வங்கிக் கணக்குகள், முதலீடுகள் ,அசையும் மற்றும் அசையா சொத்துக்களைக் கண்டுபிடிக்கும் பணி நடைபெறுகிறது. அந்த சொத்துக்களை அடையாளம் கண்டு முடக்கப்பட்டு நீதிமன்றத்தில் ஒப்படைக்கப்பட உள்ளோம்.

மேலும் அவ்வாறு முடக்கப்பட்ட சொத்துக்களை ஏலம் விட்டு இந்த மூன்று நிறுவனங்களில் முதலீடு செய்தவர்களின் ஆவணங்களை சரிபார்த்து பணம் திருப்பிக் கொடுக்கப்படும். தமிழகத்தில் மட்டும் கடந்த மூன்று ஆண்டுகளில் மட்டும் இதுபோன்று20 கோடி ரூபாய்க்கு மேல் வசூல் செய்து மோசடியில் ஈடுபட்ட நிறுவனங்கள் மீது 124 வழக்குகள் பதிவு செய்யப்பட்டுள்ளன. இதில் மாவட்ட ரீதியாக உள்ள பொருளாதார குற்றப்பிரிவு அதிகாரிகள் இந்த நிறுவனங்களின் சொத்துக்களை முடக்கும் பணியில் ஈடுபட்டனர். இதில் 250 கோடி ரூபாய் அளவில் சொத்துக்கள் முடக்கப்பட்டுள்ளது" என்று தெரிவித்தார்.

Related Stories

No stories found.
x
காமதேனு
kamadenu.hindutamil.in