பிஜி தீவில் இன்று காலை திடீரென ஏற்பட்ட நிலநடுக்கத்தால் மக்கள் அதிர்ச்சியடைந்தனர். இந்த நிலநடுக்கம் 6.4 ரிக்டர் அளவில் பதிவாகியுள்ளது.
தென் பசிபிக் கடலில் நியூசிலாந்து அருகே பிஜி தீவுகள் உள்ளது. நிலநடுக்கத்தால் அதிகம் பாதிக்கும் நாடுகளின் பட்டியலில பிஜி தீவுகள் இடம் பெற்றுள்ளது. இங்கு அடிக்கடி ஏற்படும் நிலநடுக்கத்தால் மக்கள் தங்கள் உடமைகளையும், உயிர்களையும் இழந்து வருகின்றனர்.
இந்த நிலையில், பிஜி தீவின் தலைநகர் சுவா பகுதியில் இன்று காலை 6.58 மணியளவில் கடுமையான நிலநடுக்கம் ஏற்பட்டுள்ளது. இது ரிக்டர் அளவுகோலில் 6.4 ஆக பதிவாகி உள்ளது. இதனால் பொதுமக்கள் அதிர்ச்சியடைந்தனர். அத்துடன் வீடுகளை விட்டு வெளியே ஓடிவந்தனர்.
பிஜி தீவில் நிலநடுக்கம் ஏற்பட்டது என்பதை தேசிய நிலநடுக்க அறிவியல் மையம் உறுதி செய்துள்ளது. எனினும், இதனால் ஏற்பட்ட பொருளிழப்புகள் உள்ளிட்ட விவரங்கள் எதுவும் உடனடியாக வெளிவரவில்லை. அத்துடன் சுனாமி எச்சரிக்கையும் விடப்படவில்லை.