பெங்களூரு பெண் அரசு அதிகாரி கழுத்தை அறுத்துக் கொலை செய்யப்பட்ட வழக்கில் பணிநீக்கம் செய்யப்பட்ட முன்னாள் ஓட்டுநர் போலீஸாரால் கைது செய்யப்பட்டுள்ளார்.
கர்நாடகா மாநிலம் ஷிவமொகா மாவட்டம், தீர்த்தஹள்ளியைச் சேர்ந்தவர் பிரதிமா. இவர், பெங்களூருவில் சுரங்கம் மற்றும் நில ஆய்வியல் துறையின் உதவி இயக்குநராக பணியாற்றி வந்தார். 15 ஆண்டுகளுக்கு முன் திருமணம் நடந்தது. இவருக்கு ஒரு மகன் உள்ளார்.
பெங்களூரு, தொட்டகல்லசந்திரா என்ற இடத்தில் கோகுலா அடுக்குமாடி குடியிருப்பில், பிரதிமா தனியாக வசித்தார். இவரது கணவரும், மகனும் தீர்த்தஹள்ளி என்ற பகுதியில் வசித்து வருகின்றனர். வழக்கம் போல் நேற்று முன்தினம் காலை பணிக்கு சென்ற பிரதிமா, இரவு 8:30 மணியளவில், அரசு வாகனத்தில் வீடு திரும்பியுள்ளார்.
இவரை வீட்டருகில், இறக்கிவிட்டு ஓட்டுநர் சென்றுள்ளார். பிரதிமாவின் அண்ணன் பிரதீஷ், பெங்களூரு மாநகராட்சி ஒப்பந்ததாரர். இவர், இரவு தங்கையை மொபைல் போனில் பலமுறை முயற்சித்தும் எடுக்கவில்லை. இந்த நிலையில் நேற்று காலை 8:30 மணியளவில், தங்கை வீட்டுக்கு அவர் சென்றபோது பிரதிமா கழுத்தை அறுத்து படுகொலை செய்யப்பட்டது தெரிய வந்தது.
இந்த கொலை விவகாரம் தொடர்பாக மூன்று தனிப்படை அமைக்கப்பட்டு விசாரணை நடத்தப்பட்டது. பெங்களூருவின், ஹுனசமாரனஹள்ளி கிராமத்தில், லைசென்ஸ் பெறாமல் சட்டவிரோதமாக கல்குவாரி நடத்துவதாக புகார் வந்தது. அங்கு சென்று ஆய்வு செய்த பிரதிமா, அந்த கல்குவாரியை மூடினார். இது தொடர்பாக, அரசுக்கும் அறிக்கை அளித்திருந்தார். இதுவே, அவரது கொலைக்கு காரணமாக இருக்கலாம் என அதிகாரிகள் சந்தேகித்தனர்.
ஆனால், திடீர் திருப்பமாக பிரதிமாவிடம் ஓட்டுநராக பணிபுரிந்த கிரண் என்பவர் தான் இந்த கொலை செய்ததாக தெரிய வந்தது. சமீபத்தில் தான் கிரண் பணியில் இருந்து நீக்கப்பட்டிருந்தார். அந்த ஆத்திரத்தில் உதவி இயக்குநரான பிரதிமாவை கழுத்தை அறுத்துக் கொலை செய்ததாக அவர் கூறினார். சாமராஜ்நகரில் பதுங்கியிருந்த கிரணை போலீஸார் இன்று கைது செய்தனர்.