தமிழ் சினிமா திரையுலக வரலாற்றில் ஒரு புதிய முயற்சியாக ‘ஸ்கிரிப்டிக்’ எனும் திரைக்கதை வங்கியை எழுத்தாளர் மதன் கார்க்கி மற்றும் கோ. தனஞ்ஜெயன் ஆகியோர் இணைந்து தொடங்கியுள்ளனர்.
திறமையான எழுத்தாளர்களின் திரைக்கதைகளைப் படித்து, அவற்றுள் சிறந்தவற்றை தேர்ந்தெடுத்து, படப்பிடிப்புக்குத் தயார் நிலையில் அவற்றை உருவாக்கி, தயாரிப்பு நிறுவனங்களுக்கு வழங்கும் தளமாகவும், சிறந்த திரைக்கதை எழுத்தாளர்களையும், தயாரிப்பு நிறுவனங்களையும் ஒருங்கிணைக்கவும் ஓர் புதிய முயற்சியாக ‘ஸ்கிரிப்டிக்’ திரைக்கதை வங்கி தொடங்கப்பட்டுள்ளது.
பாடலாசிரியர் மதன் கார்க்கி மற்றும் தயாரிப்பாளர்-விநியோகஸ்தர், பாஃப்டா (BOFTA) திரைப்படக் கல்லூரி நிறுவனர் கோ. தனஞ்ஜெயன் ஆகியோர் இணைந்து இந்தியாவிலேயே முதன்முறையாக, “ஸ்கிரிப்டிக்”கை தொடங்கியுள்ளனர். ஸ்கிரிப்டிக் மற்றும் www.scriptick.in என்ற அதன் இணையதளத்தை மூத்த திரைப்பட இயக்குநர் பாரதிராஜா அதிகாரப்பூர்வமாக நேற்று தொடங்கி வைத்தார்.
திறமையான எழுத்தாளர்களிடமிருந்து முழுமையாக உருவாக்கப்பட்ட, நேர்த்தியான திரைக்கதைகளை தயாரிப்பாளர்கள் மற்றும் திரைப்பட இயக்குநர்களுக்கு வழங்க உருவாக்கப்பட்டது தான் ஸ்கிரிப்டிக். தற்போது உருவாகும் பெரும்பாலான திரைப்படங்களின் திரைக்கதைகள் அனுபவம் வாய்ந்த திரைக்கதை எழுத்தாளர்களை கொண்டு தேர்ந்தெடுக்கப்படுவதில்லை. இதன் காரணமாக, தோல்வி அடையும் திரைப்படங்களின் எண்ணிக்கை ஒவ்வொரு ஆண்டும் அதிகரித்து வருகிறது. இதை கருத்தில் கொண்டு, ஸ்கிரிப்டிக் வழங்கும் திரைக்கதைகளின் தரம் அனுபவம் வாய்ந்த திரைக்கதை எழுத்தாளர்கள், திரைப்பட இயக்குநர்கள் மற்றும் நிபுணர்கள் அடங்கிய குழுவால் உறுதி செய்யப்படுகிறது.
எனவே, ஸ்கிரிப்டிக்-லிருந்து பெறப்பட்ட திரைக்கதைகள், திரைப்படங்களாக உருவாக்கப்படும்போது பார்வையாளர்களிடமிருந்து நல்ல வரவேற்பை அவை பெறும். பல சுயாதீன திரைக்கதை எழுத்தாளர்களை உருவாக்குவதும், அவர்களின் பணிக்கு உரிய ஊதியம் வழங்குவதும் ஸ்கிரிப்டிக்-ன் இலக்காகும். திரைப்படங்களுக்கான கதைகள் எழுதும் தொழிலைத் தேர்ந்தெடுக்க, அதிக எண்ணிக்கையிலான திரைக்கதை எழுத்தாளர்கள் உருவாக இந்த முன்முயற்சி ஊக்குவிக்கும்.
புள்ளி விவரம் ஒன்றை சமீபத்தில் பகிர்ந்த பிரபல தயாரிப்பாளர் எஸ்.ஆர். பிரபு, 2022 ஆகஸ்ட் முதல் அவரது குழு பல்வேறு வகைகளில் 814 கதை சுருக்கங்களைப் பெற்ற போதிலும், அவைகளிலிருந்து வெறும் 43 ( 5%) கதை சுருக்கங்கள் மட்டுமே முழு திரைக்கதைகளை படிப்பதற்கு தகுதியாக தேர்ந்தெடுக்கப்பட்டன. 2022-ம் ஆண்டில் ஸ்கிரிப்டிக் குழுவால் வாசிக்கப்பட்ட 106-க்கும் மேற்பட்ட முழு திரைக்கதைகளில், நான்கு மட்டுமே தேர்ந்தெடுக்கப்பட்டன. ஒவ்வொரு தயாரிப்பாளரும் இதே போல நூற்றுக்கும் மேற்பட்ட திரைக்கதைகளை படிக்காமல், வல்லுநர் குழுவால் தேர்ந்தெடுக்கப்பட்ட திரைக்கதைகளை மட்டுமே படித்தால், அவர்களின் நேரமும், செலவுகளும் மிச்சமாகும்.
மதன் கார்க்கி, கோ. தனஞ்ஜெயன் ஆகியோருடன் திரைக்கதை வல்லுநர் “கருந்தேள்” ராஜேஷ் தலைமையில் அமைந்துள்ள இந்த குழுவில், திரைப்பட இயக்குநர்கள், கதாசிரியர் மற்றும் திரைக்கதை நிபுணர்கள்கள் உள்ளனர். இது தவிர, ஸ்கிரிப்டிக் குழு திரைக்கதை குறித்த ஆலோசனை, செப்பனிடுதல், முறைப்படுத்துதல், திரைக்கதை மதிப்பீடு உள்ளிட்ட இதர பல சேவைகளையும் வழங்கும்.
இது குறித்து பேசிய மதன் கார்க்கி, "திரைப்படமாகவோ, வலைத்தொடராகவோ உருவாக்கப்படும் கதைகள், வலுவானவையாகவும் பார்வையாளர்களின் எதிர்பார்ப்புகளை மிஞ்சும் வகையிலும் இருக்க வேண்டும். ஸ்கிரிப்டிக், தயாரிப்பாளர்கள் மற்றும் ஒட்டுமொத்த திரைப்படத் துறைக்கும் பயனுள்ளதாக இது இருக்கும்" என்று கூறினார். இதுபற்றி கோ.தனஞ்ஜெயன் பேசும்போது, "திரைக்கதை நிபுணர்களின் பல்வேறு அளவுகோல்களை பூர்த்தி செய்யும் நல்ல திரைக்கதைகளைக் கண்டுபிடிப்பது தான் தயாரிப்பாளர்களுக்கு இருக்கும் மிகப்பெரிய சவாலாகும். அத்தகைய திரைக்கதைகளைப் பெற, நூற்றுக்கணக்கான கதை சுருக்கங்கள் அல்லது திரைக்கதைகளை அவர்கள் படிக்க வேண்டும். அந்த பெருமுயற்சியைக் குறைத்து, சிறந்த திரைக்கதைகளை மட்டுமே அவர்களுக்கு வழங்க நிபுணர்களின் பங்களிப்போடு ஸ்கிரிப்டிக் திரைக்கதை வங்கி தொடங்கப்படுகிறது" என்றார்.
“ஸ்கிரிப்டிக்” திரைக்கதை வங்கியை தொடங்கி வைத்த பாரதிராஜா, இந்த முன்னோடியான முயற்சியை பெரிதும் பாராட்டி, தனது கருத்துக்களை ஒரு வீடியோவில் பதிவிட்டுள்ளார். அந்த வீடியோ லிங்க்: