சரோஜாதேவி எனும் அபிநய தேவதை!

- பிறந்தநாள் சிறப்புப் பகிர்வு

சரோஜாதேவி எனும் அபிநய தேவதை!

நடிகை வாணிஸ்ரீயின் அஜந்தா கொண்டை, நதியா கம்மல், நதியா வளையல், குஷ்பு ஜாக்கெட் - இதெல்லாம் தமிழகத்தில் மிகப்பிரபலம். நடிகை வாணிஸ்ரீ, தன் கூந்தல் அலங்காரத்திலும் புடவைக்கட்டிலும் அப்படியொரு நேர்த்தியைக் கடைபிடித்தார். எண்பதுகளில் நதியா அணிந்திருந்த வளையல்களும் ஜிமிக்கிகளும் ஏகத்துக்கும் பிரபலம். குஷ்புவுக்கும் அப்படித்தான்!

ஆனால், நடிக்கத் தொடங்கி, மிகப்பிரபலம் அடைந்து, அதையடுத்த காலகட்டங்களில் எண்ணற்ற நடிகைகள் வந்து கலக்கிக் கொண்டிருந்த போதும், ‘சரோஜாதேவி சோப் டப்பா’ என்பது கரவொலியை எழுப்பியது. அந்த அளவுக்கு, நடிகை சரோஜாதேவி, தன் நடிப்பாலும் தமிழ் உச்சரிப்பாலும் இரண்டு தலைமுறை ரசிகர்களை ஈர்த்திருந்தார்.

மைசூர்தான் பிறப்பிடம். அப்பா ஜாவர் பைரப்பா காவல்துறையில் பணியாற்றினார். அம்மா ருத்ரம்மா அன்பையும் பாசத்தையும் புகட்டி வளர்த்தார். இந்தத் தம்பதிக்கு நான்கு பெண் குழந்தைகள். சரஸ்வதி தேவி, பாமாதேவி, சீதா தேவி, ராதாதேவி என நான்கு பேருக்கும் பெயர்கள் சூட்டி வளர்த்தார்கள்.

நால்வரில் ராதாதேவியை, சிறுவயதில் நடனம் கற்றுக்கொள்ள அனுப்பினார் தந்தை. அதன்படி பரதம் கற்றுக் கொண்டார். ஆனால் கற்றுக் கொடுத்த ஆசிரியர், ராதாதேவியின் பரதத்தில் வியந்தாரோ இல்லையோ, அவரின் ஒவ்வொரு அபிநயத்தையும் ஆச்சரியத்துடன் பார்த்தார். ‘’ராதாதேவியை சினிமாவில் நடிக்கவைங்க. எங்கேயோ போயிருவா’’ என்று மாஸ்டர் சொன்னார். அக்கம்பக்கத்தினரும் அப்படியே சொன்னார்கள்.

1938-ம் ஆண்டு பிறந்த ராதாதேவியை சினிமாவுக்குள் நடிக்கவைக்க முயற்சிகள் மேற்கொள்ளப்பட்டன. அதேசமயம், போலீஸ் அப்பா, ‘’ஆபாசமாக நடிக்கக் கூடாது, நீச்சல் உடையில் தோன்றக்கூடாது’’ என்றெல்லாம் சொல்லிவைத்தார். ராதாதேவியும் தலையாட்டினார். வருகிற தயாரிப்பாளர்களிடமும் இயக்குநர்களிடமும் இந்தக் கண்டிஷன் வலியுறுத்திச் சொல்லப்பட்டது. முதல்கட்டமாக ராதாதேவியை சினிமாவுக்காக பெயர் மாற்றினார்கள். ‘சரோஜாதேவி’ என்றாக்கினார்கள்.

1955-ம் ஆண்டு, ஹொன்னப்ப பாகவதரின் தயாரிப்பில், ‘மகாகவி காளிதாஸ்’ கன்னடத்தில் வெளியானது. இந்தப் படத்தில் நடித்த சரோஜாதேவிக்கு அப்போது 17 வயது. முதல் படமே மிகப்பெரிய வெற்றியைப் பெற்றது. முதல் படத்திலேயே எல்லோரும் கவனித்துப் பாராட்டுகிற அளவுக்கு முத்திரையைப் பதித்தார்.

அப்போது எம்ஜிஆருக்கு இங்கே சோதனைக் காலம் என்றுதான் சொல்லவேண்டும். ராஜா வேடப் படங்கள் ஓடின. ஆனால், சமூகப் படங்கள் பெரிதாக ஓடவில்லை. தன்னையும் தன் எதிர்காலத்தையும் திட்டமிட்டுக் கொள்ள, பல முனைப்புகள் காட்டினார் எம்ஜிஆர். ‘நாடோடி மன்னன்’ படத்தை தயாரித்து இயக்கினார்.

முன்னதாக, சரோஜாதேவியைப் பற்றி அவருக்குச் சொன்னார்கள். சரோஜாதேவி நடித்த அந்தப் படத்தை எம்ஜிஆரும் பார்த்தார். ‘’தமிழ் தெரியுமா?’’ என்று எம்ஜிஆர் கேட்க, ‘’தெரியும்’’ எனத் தலையாட்டினார். ஆனால், தெரியாது என்பதைப் புரிந்துகொண்டார் எம்ஜிஆர். ஆனாலும் தமிழில் பயிற்சி கொடுக்கப்பட்டது. தமிழை, வெளிமாநிலத்தவர்கள், கொஞ்சம் முரட்டுத்தனமாகப் பேசுவது வாடிக்கையாக இருக்க, சரோஜாதேவியிடம் இருந்து வெளிப்பட்ட தமிழ், கொஞ்சி விளையாடியது. ‘நாடோடி மன்னன்’ படத்தில் வாய்ப்பும் கிடைத்தது.

படத்தின் முக்கால்வாசி காட்சிகள் கறுப்புவெள்ளையில் இருக்கும். பிறகு க்ளைமாக்ஸ் வரையிலான காட்சிகள், வண்ணத்தில் ஜொலிக்கும். அப்படி வண்ணப்படமாக மாறும்போதுதான் சரோஜாதேவியின் எண்ட்ரி இருக்கும். இப்படி, வண்ணமயமாக ஆரம்பித்தது சரோஜாதேவியின் தமிழ்த் திரைப் பயணம்.

கன்னடத்தில், முதல் படம் ஹிட்டடித்தது போலவே, இங்கேயும் பேசப்பட்டார். பலரும் ரசிகர்களானார்கள். அடுத்தடுத்து படங்கள் மளமளவென வரத்தொடங்கின. 1958-ல் வெளியான ‘நாடோடி மன்னன்’ படத்தை அடுத்து, ஏகப்பட்ட படங்களில் வாய்ப்புகள் குவிந்தன. பிஸியான நடிகையானார் சரோஜாதேவி.

இயக்குநர் ஸ்ரீதர் தன் முதல் இயக்கத்தில் உருவாக்கிய ‘கல்யாண பரிசு’ படத்தின் நாயகி வசந்தியாக நடித்தார் சரோஜாதேவி. தன் நடிப்பாலும் கேரக்டராலும் கலங்கடித்தார். அந்தப் படம் ஏற்படுத்திய தாக்கத்தால், காதலித்துத் தோற்றுப்போன ஆணும் பெண்ணும் காதலின் அடையாளமாக, தங்கள் வீட்டில் பிறந்த பெண் குழந்தைக்கு, ‘வசந்தி’ என்றே பெயர்சூட்டினார்கள்.

கலைஞர் கருணாநிதியின் வசனத்தில், எல்.வி.பிரசாத் இயக்கத்தில் ‘இருவர் உள்ளம்’ படத்திலும் கனமான கேரக்டர் கிடைத்தது. கருணாநிதி எழுத்தில் கொஞ்சினார். சரோஜாதேவியோ தன் உச்சரிப்பால் தமிழைக் கொஞ்சினார். அப்படித் தமிழ் பேசுவதையும் சரோஜாதேவியையும் ஏற்றுக்கொண்டார்கள் தமிழக மக்கள்.

எம்ஜிஆருக்கு அந்தக் கட்டத்தில் காலில் அடிபட்டிருந்தது. பல படங்கள் எடுக்க உறுதிசெய்யப்பட்டு, எப்போது ஆரம்பிப்பது என்பதே தெரியாமல், கிணற்றில் போட்ட கல்லாக இருந்தது. ‘’இந்தப் படம் ஓடவேண்டும் என்றால், எம்ஜிஆருக்கு ஜோடியாக சரோஜாதேவியைப் போட்டால்தான் தாமதித்த நஷ்டத்துக்கு கணக்கை நேர் செய்யமுடியும்’’ என தயாரிப்பாளர்களும் இயக்குநர்களும் முடிவு செய்தார்கள்.

சரோஜாதேவியிடம் விஷயத்தைச் சொன்னார்கள். தமிழில் தன்னை அடையாளம் காட்டிய எம்ஜிஆருக்கு நன்றி செலுத்தும் விதமாக, நெருக்கடியான நேரமின்மையிலும் கூட, பகலென்றோ இரவென்றோ பார்க்காமல் நேரம் ஒதுக்கிக் கொடுத்தார் சரோஜாதேவி. அன்றைய காலகட்டத்தில், எம்ஜிஆர் படம் என்றாலே சரோஜாதேவிதான் ஜோடி என்ற பேச்சு அடிபட்டது. அதேபோல், சிவாஜிக்கு பத்மினியும் எம்ஜிஆருக்கு சரோஜாதேவியும் இணையான, பொருத்தமான ஜோடி என பத்திரிகைகள் எழுதின. ரசிகர்களும் அப்படித்தான் உணர்ந்தார்கள்.

ஜெமினி கணேசன், சிவாஜி, எஸ்.எஸ்.ஆர். என பல நடிகர்களுடனும் நடித்தார் சரோஜாதேவி. எல்லா நடிகர்களுக்கும் பொருத்தமாக்கிக் கொண்டார். அதேபோல் இயக்குநர்களின் நடிகை என்றும் கொண்டாடப்பட்டார்.

தெலுங்கில் என்.டி.ஆர். நாயகனாக நடித்து, மிகப்பெரிய வெற்றியைப் பெற்ற ‘ராமுடுபீமுடு’ படத்தை தமிழில் எடுக்க முடிவு செய்தார் நாகிரெட்டி. அவர் அப்படி முடிவு செய்ததும் அதிகாலையிலேயே சென்று கதவைத் தட்டிய இடம்... சரோஜாதேவியின் வீடு. ‘டைட் ஷெட்யூல்’ என்றபோதும் நேரம் ஒதுக்கித் தந்தார் சரோஜாதேவி. எம்ஜிஆர் இரட்டை வேடங்களில் நடித்த அந்தப் படம் ‘எங்க வீட்டு பிள்ளை’ என்பதும் அது கொடுத்த இமாலய வெற்றியும் தெரியும்தானே!

அதேபோல், ஏவி.எம். தயாரிப்பில் எம்ஜிஆர் நடித்த ஒரே படம் ‘அன்பே வா’. இதிலும் சரோஜாதேவியை நாயகியாக்கினால்தான் படம் மிகச்சிறப்பாக வரும் என உறுதியாக முடிவு செய்தார்கள். முழுக்க முழுக்க எம்ஜிஆர் பாணியே இல்லாமல் வந்த இந்தப் படமும் மிகப்பிரம்மாண்ட வெற்றியைப் பெற்றது. ‘ராஜாவின் பார்வையில்’ பாடலைப் பார்த்துவிட்டு, அழகு ஜொலிக்க மகாராணியாகவே வலம் வரும் சரோஜாதேவிக்கு திருஷ்டி வளித்த பெண்களெல்லாம் உண்டு.

எம்ஜிஆருடன் அதிக படங்களில் நடித்தவர் சரோஜாதேவி. 26 படங்களில் நடித்தார். அதன் பிறகு இன்னும் கூடுதலாக இரண்டு படங்கள் சேர்த்து நடித்து அந்தப் பெருமையைப் பெற்றார் ஜெயலலிதா.

‘பார்த்தால் பசி தீரும்’ படத்தில், சாவித்திரி, செளகார் ஜானகி இருவரும் நடிக்க, இருவருக்கும் நடுவே சரோஜாதேவி தனித்துவ நடிப்பால் கவர்ந்திருப்பார். ‘பாலும் பழமும்’, ‘ஆலயமணி’, ‘என் தங்கை’, ‘பாகப்பிரிவினை’ முதலான பல படங்களில் சிவாஜியுடன் நடித்த சரோஜாதேவியின் நடிப்பைப் பார்த்துவிட்டு, ‘’சிவாஜியுடன் நடிக்கும்போது இன்னும் சற்று கூடுதலாகவே தன் திறமையை வெளிப்படுத்துகிறார் சரோஜாதேவி’’ என்று பத்திரிகைகள் இவரின் நடிப்பைக் கொண்டாடின.

’’சிவாஜியுடன் சரோஜாதேவி நடித்த படங்களும், சிவாஜியுடன் ஜெயலலிதா நடித்த படங்களும் இரண்டு நடிகையரின் நடிப்புத் திறனை வெளிக்காட்டுகிற வகையிலான படங்களாகத்தான் இருக்கின்றன’’ என்று தமிழக ரசிகர்களும் பாராட்டினார்கள்.

’தெய்வத்தாய்’, ‘பறக்கும் பாவை’, ‘புதிய பறவை’. ‘அருணோதயம்’, ’பெற்றால்தான் பிள்ளையா’, ’கலங்கரை விளக்கம்’, ‘படகோட்டி’ உள்ளிட்ட பல படங்களில் சரோஜாதேவியின் அழகுக்காகவும் பாடல்களுக்கு அவர் கொடுத்த ரியாக்‌ஷனுக்காகவும் திரும்பத் திரும்பப் பார்த்தார்கள் ரசிகர்கள்.

மிகப்பெரிய நடன அசைவுகளெல்லாம் இருக்காது சரோஜாதேவிக்கு. மேலும், எம்ஜிஆருக்குத் தகுந்தபடியே நடன ஸ்டெப்புகள் கட்டமைக்கப்பட்டன. அதேபோல், சிவாஜிக்கு தகுந்தது போலவே, பாடல்களிலும் நடிப்புக்கு முக்கியத்துவம் தரப்பட்டன. ‘ஏதோ ஏதோ ஏதோவொரு மயக்கம்’ என்றும் மயக்குவார். ‘காதல் சிறகைக் காற்றினில் விரித்து’ என்றும் சோகத்தில் ஆழ்த்துவார்.

‘உன்னை ஒன்று கேட்பேன் உண்மை சொல்லவேண்டும்’ என்று ஸ்டைல் பண்ணுவார். ‘நான் பேச நினைப்பதெல்லாம் நீ பேசவேண்டும்’ என்று ‘ம்ம்... ம்ம்ம்ம்ம்... ம்ம்ம்ம்ம்ம்ம்’ என்று ஜாலமுகம் காட்டுவார். ‘தங்கத்திலே ஒரு குறை இருந்தாலும்’ என்று நெகிழவைப்பார். ‘உன்னைக்கண்டு நானாட என்னைக் கண்டு நீயாட’ என்று உற்சாகமூட்டுவார். பாடலிலும் நடிப்பிலும் அபிநய ஜாலம் இழைத்துக்கொண்டே இருந்தார் சரோஜாதேவி. அதனால்தான் அவரை அபிநய சரஸ்வதி என்று பட்டம் கொடுத்துக் கொண்டாடினார்கள். கன்னட மொழிக்காரர் என்றாலும் கிளிப்பிள்ளை போல் தமிழைக் கொஞ்சிக் கொஞ்சிப் பேசியதால்தான் ‘கன்னடத்துப் பைங்கிளி’ என்று பெருமையுடன் அறிவித்தார்கள்.

’கொடி அசைந்ததும் காற்று வந்ததா’ என்ற பாடலையும் ‘தொட்டால் பூமலரும்’ பாடலையும் சரோஜாதேவிக்காக பார்த்த ரிப்பீடட் ரசிகர்கள் உண்டு.

எப்பேர்ப்பட்ட கேரக்டரையும் தன் அசாத்திய நடிப்பால் மெருகேற்றிக் காட்டுகிற சரோஜாதேவி, சாவித்திரி, பத்மினி, தேவிகா, விஜயகுமாரி என பலர் இருந்தபோதும் தனித்துவத்துடன் ஜொலித்தார்; ஜெயித்தார். சரோஜாதேவி பேசிய ‘புதிய பறவை’ படத்தின், ‘கோப்பால்’ எனும் வசனம் படம் வெளியான தருணத்தில் மிகப்பெரிய தாக்கத்தை ஏற்படுத்தியது. அடுத்த தலைமுறை இதை காமெடியாகக் கையாண்டது என்பதுதான் வேதனை.

தெலுங்கு, கன்னடம், இந்தி என பல மொழிகளிலும் நடித்துக் கலக்கிய சரோஜாதேவிக்கு பத்ம விருதுகள் பலவும் வழங்கப்பட்டன. ஆந்திரத்தில் இருந்தும் தமிழகத்தில் இருந்தும் கர்நாடகத்தில் இருந்தும் என அந்தந்த அரசாங்கங்கள் விருதுகள் கொடுத்து கெளரவித்துக் கொண்டாடின.

எம்ஜிஆருடன் 26 படங்களிலும் சிவாஜியுடன் 22 படங்களிலும் சூர்யாவுடன் ‘ஆதவன்’ மாதிரியான படங்களிலும் நடித்த சரோஜாதேவியை அரசியலுக்கு வரச்சொல்லி எம்ஜிஆர் எத்தனையோ முறை அழைத்தார்.

அதேபோல், மத்தியில் இருந்த காங்கிரஸ் அரசாங்கமும் எழுபதுகளிலேயே கட்சியில் சேரும்படி அழைப்புமேல் அழைப்பு விடுத்தது. இங்கே, எம்ஜிஆருக்கும் கைகொடுக்கவில்லை. கைச்சின்னம் கொண்ட காங்கிரஸ் கட்சிக்கும் கைகொடுக்கவில்லை சரோஜாதேவி.

‘’நேர்மையாக வாழ்வதற்குத்தான் என் அப்பா சொல்லித்தந்திருக்கிறார். அதன்படியே வாழ்ந்துகொண்டும் இருக்கிறேன். அரசியலில் நேர்மையைக் கடைப்பிடிக்கமுடியுமா என்று தெரியவில்லை. என்னை மன்னித்துக்கொள்ளுங்கள்’’ என்று சொல்லிவிட்டு, இன்றைக்கும் தன் கணவர் தொடங்கி நடத்திவந்த நிறுவனத்தை நிர்வகித்து வருகிறார்.

1938-ம் ஆண்டு ஜனவரி 7-ம் தேதி பிறந்த சரோஜாதேவிக்கு 84-வது பிறந்தநாள்.

முக பாவ அபிநயங்களிலும் கிளிக்குரல் கொஞ்சலிலும் நம்மையெல்லாம் சொக்கிப்போட்ட சரோஜாதேவியை மனதார வாழ்த்துவோம்.

Related Stories

No stories found.
x
காமதேனு
kamadenu.hindutamil.in