ஷாருக்கானின் ‘ஜவான்’ திரைப்படத்தின் வெளியீடு தள்ளிப்போக வாய்ப்பிருப்பதாகத் தகவல்கள் வெளியாகியுள்ளன.
தமிழ்த் திரைப்பட இயக்குநரான அட்லி தற்போது ‘ஜவான்’ படத்தின் மூலம் பாலிவுட்டிலும் என்ட்ரி கொடுக்க உள்ளார். ஷாருக்கான், நயன்தாரா, யோகிபாபு உள்ளிட்டப் பலர் இதில் நடிக்கின்றனர். நடிகர் விஜய்சேதுபதி இதில் வில்லன் கதாபாத்திரத்தில் நடிக்கிறார். நடிகர் விஜய் சிறப்புத் தோற்றத்தில் நடிக்கும் காட்சி கிட்டத்தட்ட 15-20 நிமிடங்கள் வர இருப்பதாகவும் தகவல்கள் வெளியாகியுள்ளன. ’ஜவான்’ படம் இந்த ஆண்டு ஜூன் மாதம் 2-ம் தேதி வெளியாகும் எனப் படக்குழு முன்பு அறிவித்திருந்தது.
ஆனால், தற்போது அதன் வெளியீட்டில் மாற்றங்கள் இருக்கும் எனத் தெரிகிறது. மும்பையில் விறுவிறுப்பாக நடந்து வரும் இதன் படப்பிடிப்பு ஏப்ரல் மாத இறுதியில் முடிக்க முதலில் படக்குழு திட்டமிட்டு இருந்தது. ஆனால், சஞ்சய் தத்தின் ஷூட்டிங் பிஸி காரணமாக படப்பிடிப்பு முடிக்க தாமதம் ஆகலாம் எனவும் இதனால், வெளியீடு தள்ளிப்போகவும் வாய்ப்பிருக்கிறது எனவும் தகவல் வெளியாகி இருக்கிறது. சஞ்சய் தத் தற்போது விஜய்யின் ‘லியோ’ படப்பிடிப்பில் பிஸியாக இருக்கிறார் என்பது குறிப்பிடத்தக்கது.