கே.எஸ்.சேதுமாதவன்: விருதுகளால் கர்வப்படாத கலைஞன்!

பலராலும் பெரிதும் பேசப்பட்ட தனது படங்களால், 10 தேசிய விருதுகளுக்கும் எண்ணமுடியாத மாநில விருதுகளுக்கும் சொந்தமானவர் இயக்குநர் கே.எஸ்.சேதுமாதவன். வயது மூப்பின் காரணமாக தனது 91-வது வயதில், இன்று(டிச.24) காலமானார் இந்தத் தரணி பேசும் படைப்பாளி..களத்தூர் கண்ணம்மாவில் குழந்தை நட்சத்திரமாக அறிமுகமான கமல்ஹாசனை, முதன்முதலில் நாயகனாக்கி பெருமை தேடிக்கொண்டது மலையாளத் திரையுலகம். அந்த வாய்ப்பை அவருக்கு உருவாக்கித் தந்தவர் கே.எஸ்.சேதுமாதவன். இவரது இயக்கத்தில் ‘கன்யா குமாரி’ படத்தில்தான் முதன்முதலில் நாயகனாக அவதரித்தார் கமல்ஹாசன்..எம்ஜிஆருக்கு நாளை நமதே, சிவகுமாருக்கு பால்மனம், மறுபக்கம், ஜெய்சங்கருக்கு கல்யாண ஊர்வலம், கமல் - கெளதமிக்கு நம்மவர் என தமிழில் குறிப்பிடத்தக்க படங்களையும் இயக்கியவர் சேதுமாதவன். இதில் சிவகுமார் நடித்த ‘மறுபக்கம்’ சிறந்த படத்துக்கான தேசிய விருதைப் பெற்றது. எழுத்தாளர் இந்திரா பார்த்தசாரதி எழுதிய ‘உச்சி வெயில்’ என்னும் குறுநாவலையே மறுபக்கம் ஆக்கியிருந்தார் சேதுமாதவன். நான்கைந்து மாதங்களுக்கு முன்பு, சிறப்பு மலர் ஒன்றுக்காக சேதுமாதவனை போனில் பிடித்தேன். கமல்ஹாசன் குறித்துப் பேசவேண்டும் என்றதுமே உற்சாகமாகிவிட்டார். அவர் நமக்களித்த இறுதிப் பேட்டியின் ஒரு பகுதியை காமதேனு வாசகர்களுக்காக இங்கே தருகிறோம்..“கன்யா குமாரி படத்துல ஹீரோ வேசத்துக்கு கேரளாவுல நிறைய பேரைப் பார்த்தேன். ஆனா, எனக்கு பிடிச்ச மாதிரி யாரும் கிடைக்கல. வீட்ல நானும் நண்பர்களுமா உட்கார்ந்து இதைப்பத்தி பேசிக்கிட்டு இருந்தோம். அப்போ திடீர்ன்னு என் வீட்டுக்கு ஒரு வாலிபர் வந்தாரு. அவரைப் பார்த்ததுமே எனக்கு ரொம்பப் பிடிச்சுப் போச்சு. என்னோட படத்துக்கான நாயகனா நான் எப்படி மனசுல உரு ஏத்தி வைச்சுருந்தேனோ அப்படியே இருந்தாரு அவர். ‘நீ யாருப்பா’ன்னு கேட்டேன். ‘என்னைத் தெரியலையா? நான் தான் கமல்’ன்னு சிரிச்ச முகத்தோட சொன்னாரு..நான் உற்சாகமாகிட்டேன். ஏன்னா, கமல் அதுக்கும் முன்னமே என்னோட ‘கண்ணும் கரலும்’ படத்துல குழந்தை நட்சத்திரமா நடிச்சுருந்தாரு. அந்தப் படத்துலயே எங்க அம்மாவுக்கு கமலோட நடிப்பு ரொம்பப் பிடிக்கும். அம்மாவைக் கூப்பிட்டு ‘கமல் வந்திருக்கார்’னு சொன்னேன். அம்மாவுக்கு ரொம்பவே சந்தோஷம். ‘நல்லா வளர்ந்துட்டியேப்பா’ன்னு சொன்னாங்க. ‘நான் இப்போ எடுத்துட்டு இருக்குற படத்துல நடிக்கிறியா’ன்னு அப்பவே கமல்கிட்ட கேட்டுட்டேன். அவரும் ஓகே சொல்லி நடிச்சாரு.கமல் அன்னிக்கு எப்படி என் வீட்டுக்கு வந்தாரு. அது தற்செயலா நடந்துச்சா? யாராவது சொல்லி வந்து பார்த்தாரான்னு ஞாபகமில்லை. வயது 91 ஆயிருச்சுல்ல...” என்று கமல் குறித்த ஃப்ளாஷ் பேக்கைச் சொன்னார் சேதுமாதவன்.தமிழ், மலையாளம், இந்தி, தெலுங்கு, கன்னடம் என பல மொழிகளிலும் படங்களை இயக்கி இருக்கும் கே.எஸ்.சேதுமாதவன், வரிசையாய் விருதுகளைப் பெற்றாலும் அதற்கான ஆர்ப்பாட்டம் துளியும் இல்லாது அடக்கமாக வாழ்ந்தவர். .நாட்டு நடப்புகளைப் பேசிவிட்டு நாயகன் கமலைப் பற்றி மீண்டும் பேசத் தொடங்கினார் சேதுமாதவன். “சின்ன வயதிலிருந்தே கமலுக்கு தனிப்பட்ட திறமைகள் நிறைய உண்டு. குழந்தை நட்சத்திரமா என்னோட படங்களில் நடிக்கும்போதே வெளிப்புறப் படப்பிடிப்புகளில் ரொம்ப முதிர்ச்சியா நடந்துக்குவாரு. முகத்தில் குழந்தைத் தனம் இருக்கும். ஆனா, அவர் செயல்பாட்டில் ஒரு மெச்சூரிட்டி தெரியும். தன்னுடைய பாதை இதுதான் எனத் தெளிவாக தெரிந்ததால், அப்பவே உலக சினிமாக்களைப் பார்த்து தனது சினிமா அறிவை விசாலமாக்கிக்கிட்டாரு. ‘தமிழனா பிறந்தாலும் நான் மலையாளி’ன்னு வேடிக்கையாச் சொல்லுவாரு. மலையாள மக்கள் மத்தியில் இன்னிக்கும் கமல் மேல நல்ல மரியாதை இருக்கு. மலையாளத் திரையுலகிலும் அவரது அபாரமான நடிப்புதான் அதுக்கு காரணம்..கமல் இன்னிக்கு அரசியலுக்கு வந்துட்டாரு. ஆனா அரசியல் ஆர்வம் அவருக்குள்ள இன்னிக்கு வந்தது இல்ல. அந்தப் பொறி ரொம்ப வருஷமா இருக்குது. அது இப்போதான் வெளிப்பட்டுருக்கு. ‘நம்மவர்’ ஷூட்டிங் நடந்தபோது ஒரு நாள் ரிலாக்ஸ்டா உட்கார்ந்து பேசிட்டு இருந்தோம். அப்போ கமல், ‘முன்னாடி எல்லாம் எங்க வீட்டோட தளம் ரோட்டைவிட உயரத்துல இருந்துச்சு. இப்போ வீட்டை விட ரோடு உயரமாகிடுச்சு. லஞ்சத்துக்காகவும், தான் சம்பாதிக்கணும் கிறதுக்காகவும் சும்மா சும்மா ரோட்டைப் போட்டு இப்டி நாசம் பண்ணிட்டாங்க’ன்னு ஆதங்கப்பட்டாரு. நடிகனா ஏசி கார்ல உக்காந்துட்டுப் போறவரா இல்லாம, தன்னைச் சுத்தி நடக்குற விஷயங்களில் அப்பவே அவருக்கு அரசியல் பார்வை இருந்துச்சு.கமல் இந்த அளவுக்கு உயரே வர அவரோட அர்ப்பணிப்பும் ஒரு காரணம். 1977-ல் கமல் - ஷோபா காம்பினேஷன்ல ‘ஓர்மகள் மரிக்குமோ’ ன்னு மலையாளத்தில் ஒரு படம் எடுத்தேன். அந்தப் படத்தோட ஷூட்டிங் நடந்துட்டு இருந்தப்போதான் கமலோட அம்மா இறந்து போனாங்க. அந்த நேரத்தில் அவுட்டோர் ஷூட்டிங் பிளான் செஞ்சுருந்தோம். அம்மாவோட அடக்கம் முடிஞ்சதுமே கமல் எனக்கு போன் செஞ்சாரு. ‘அவுட்டோர் ஷூட்டை தள்ளிவைச்சுக்கலாம்’ன்னு சொன்னேன். ஆனா அவரு, ‘என்னை நம்பிப் பணம் போட்டுருக்கீங்க... அதெல்லாம் தள்ளிவைக்க வேண்டாம். சரியான நேரத்துக்கு வந்திடுவேன்’னு சொல்லிட்டு அதேமாதிரி ஸ்பாட்ல வந்து நின்னாரு. .அந்தப் படத்தோட தயாரிப்பாளரும் நான்தான். ஒரு மனிதர் எந்த அளவுக்கு தொழில் பக்தி உள்ளவரா இருந்தா, இப்படி செய்யமுடியும்னு யோசிச்சுப் பாருங்க” என்று கமல் பற்றி சிலாகித்துப் பேசினார் சேதுமாதவன்..சேதுமாதவன் 1951-ல், இயக்குநர் கே.ராமநாதனிடம் உதவியாளராக தனது சினிமா பயணத்தைத் தொடங்கியவர். மலையாளத்தில் இவர் இயக்கிய முதல் படம் ஞான சுந்தரி. அறுபதுக்கும் மேற்பட்ட படங்களை இயக்கி இருக்கிறார் சேதுமாதவன். .இவற்றில் பெரிதும் பேசப்பட்ட படங்கள் அனைத்துமே புகழ்பெற்ற இலக்கியப் படைப்புகளின் தழுவலில் பிரசவித்தவையே. இயக்குநராக திரைத் துறையில் நுழைந்த சேதுமாதவன், அடுத்த பத்தே ஆண்டுகளில் (1961) வீரவிஜயா என்ற சிங்களப் படத்தை தயாரிக்கும் அளவுக்கு தனக்குள்ளே சினிமா திறமைகளை வளர்த்துக் கொண்டவர் என்பது குறிப்பிடத் தக்கது.

கே.எஸ்.சேதுமாதவன்: விருதுகளால் கர்வப்படாத கலைஞன்!

என்.சுவாமிநாதன்

Related Stories