சண்டைக் காட்சிகள் சூப்பர் வுமன் அளவுக்கு இல்லை - ’ராங்கி’ படம் குறித்து த்ரிஷா கமென்ட்!

சண்டைக் காட்சிகள் சூப்பர் வுமன் அளவுக்கு இல்லை - ’ராங்கி’ படம் குறித்து த்ரிஷா கமென்ட்!

’பொன்னியின் செல்வன்’ வெற்றிக்குப் பிறகு நடிகை த்ரிஷாவின் ‘ராங்கி’ திரைப்படம் இந்த மாத இறுதியில் திரையரங்குகளில் வெளியாக இருக்கிறது.

’ராங்கி’ படம் தொடர்பான பத்திரிகையாளர்கள் சந்திப்பு நேற்று மாலை சென்னையில் நடைபெற்றது. இதில் கலந்து கொண்டு நடிகை த்ரிஷா பேசியதாவது; "முதலில் என் தயாரிப்பாளர்கள் சுபாஷ்கரன் சார் மற்றும் தமிழ்க்குமரன் சார் இவர்களுக்கு நன்றி சொல்ல விரும்புகிறேன். ஏனென்றால் ஹீரோயின் சென்ட்ரிக் படம் என்ற எந்தவித கட்டுப்பாடும் இல்லாமல் மிகப் பிரம்மாண்டமாக இந்தப் படத்தின் படப்பிடிப்பு நடத்த எல்லாவிதமான ஆதரவும் கொடுத்தார்கள்.

தயாரிப்பு வேலைகள் எந்த அளவுக்கு சிறப்பு என்பதை படம் பார்க்கும் போது நீங்களே புரிந்து கொள்வீர்கள். வெளிநாடுகளில் படப்பிடிப்பு நடக்கிறது என்றால் பொதுவாக படக்குழு ஒருமுறை போய் வருவார்கள். ஆனால், இதில் நாங்கள் இரண்டு முறை போய் வந்தோம். பேலன்ஸ் ஷூட் இருக்கிறது, மீண்டும் உஸ்பெகிஸ்தான் போக வேண்டும் என்று இயக்குநர் சரவணன் சார் சொன்னபோது தயாரிப்பு தரப்பில் உடனே சம்மதம் தெரிவித்தார்கள். அதற்காக லைகா புரொடக்‌ஷனுக்கு நன்றி. இரண்டு வருடங்கள் கரோனா கழித்து இந்த படம் வெளியாவது மிகப்பெரிய ஆறுதலாகவும் சந்தோஷமாகவும் இருக்கிறது.

ஒரு படத்தில் நடிகையாக என்னுடைய வேலையை நான் செய்து முடித்து விடுவேன். ஆனால், ஒரு படத்தின் இசை, படத்தொகுப்பு இதெல்லாம் தான் எந்தவொரு படத்தையும் இன்னும் மேம்படுத்த உதவும். அந்த வகையில் நான் போன வாரம் தான் முழு படத்தையும் பார்த்தேன். இசை, படத்தொகுப்பு என அனைத்து பணிகளும் சிறப்பாக வந்து ஒரு நம்பிக்கை கொடுத்தது. இதற்கு மேல் இந்தப் படத்தை பார்வையாளர்கள் தான் பார்த்து எப்படி இருக்கிறது என்று முடிவு செய்ய வேண்டும். ஷூட்டிங் போன பின்பு ஷூட்டிங் போனது போலவே தெரியாத அளவுக்கு ஜாலியாக வேலை பார்த்தேன்.

மாஸ்டர், ‘நான் இருக்கிறேன் பார்த்துக் கொள்ளலாம்’ என்று சொன்னார். அதற்கு நன்றி. இந்தப் படத்தில் சண்டை காட்சிகளை பொறுத்தவரை சூப்பர் வுமன் படம் அளவுக்கு இல்லை. மிக இயல்பாக அந்த சூழ்நிலைக்கு என்ன தேவையோ அது மட்டும் தான் கொடுத்திருப்பேன். உஸ்பெகிஸ்தானில் முதல் முறையாக ஒரு படத்தின் படப்பிடிப்பை நடத்தி இருக்கிறோம். மிகவும் சவாலான விஷயம் அது.

யூரோப், அமெரிக்கா போன்ற நாடுகளில் படப்பிடிப்பு நடத்துவது என்பது மிகவும் எளிது. ஏனென்றால் அங்கு இதற்கு முன்பே நிறைய படங்களின் படப்பிடிப்பு நடந்ததும் ஒரு காரணம். ஆனால், உஸ்பெகிஸ்தானில் எங்கள் மொழி அவர்களுக்குப் புரியவில்லை... அவர்களது மொழி எங்களுக்குப் புரியவில்லை. மேலும், அங்கு நாளே கொஞ்சம் மெதுவாக தான் தொடங்கும்.

மிலிட்டரியை அடிப்படையாகக் கொண்ட படம் என்பதால் அது சார்ந்த எக்யூப்மென்ட்ஸ் எல்லாம் உண்மையாக வேண்டும் என்று சரவணன் எதிர்பார்த்தார். அதையெல்லாம் உஸ்பெகிஸ்தானில் இருந்த மிலிட்டரி தான் எங்களுக்கு கொண்டுவந்து கொடுத்தது. நானும் உஸ்பெகிஸ்தானுக்கு செல்வது இதுதான் முதல்முறை. அந்த ஊரின் அழகை எந்த ஒரு சமரசமும் இல்லாமல் சக்தி சார் படத்தில் அழகாக கொடுத்துள்ளார்.

மொத்த படக் குழுவுக்கும் நன்றி. என்னதான் கதாநாயகியை மையப்படுத்திய படம் என்று சொன்னாலும் அந்தப் படக்குழு சரியாக இல்லை என்றால் படம் ஓகேவா தான் வரும். ஆனால் இந்த படத்தைப் பொறுத்தவரைக்கும் எல்லாமே மிகச் சிறப்பாக அமைந்திருக்கிறது" இவ்வாறு த்ரிஷா பேசினார்.

Related Stories

No stories found.
x
காமதேனு
kamadenu.hindutamil.in