நா.இரமேஷ்குமார்
“இந்திய சினிமா வரலாற்றிலேயே முதல் முறையா நடிகர் ஒருவருடன், நிஜ சிம்பன்ஸியையும் ஒரு கேரக்டர்ல நடிக்க வெச்சிருக்கோம் சார்” என்று மார்கழியின் மதிய நேரத்தில் தி.நகர் பனகல் பூங்காவில் எனக்கு வகுப்பெடுத்துக் கொண்டிருந்தார் ‘கொரில்லா’ பட இயக்குநர் டான் சாண்டி.
படத்தின் காட்சிகளை அவர் சொல்லிக்கொண்டேபோக, நான் சிரித்துக்கொண்டேயிருந்தேன். தொப்பையைக் குறைக்க, காதில் ஹெட்செட் மாட்டியபடியே வாக்கிங் போன அங்கிளும், செல்போனில் யாருடனோ சண்டை போட்டபடியே ஜிம்மியுடன் வந்த அக்காவும் எனது சிரிப்புச் சத்தம் கேட்டு, முறைதபடியே விலகி நடந்தார்கள். ஒருவழியாக இயல்புக்குத் திரும்பி பேட்டியை ஆரம்பித்தேன்.
‘கொரில்லா’ என்ன கதை?
படத்தோட மொத்த கதையும் ஒரே வரிதான். கொரில்லா அட்டாக், கொரில்லா போர் முறையில் தாக்குதல்னு கேள்விப்பட்டிருப்போம் இல்லையா, அந்த மாதிரி, வாழ்க்கைச் சூழல்ல சிக்கி சின்னாபின்னாமாகிற நாலு பேர் ஒண்ணு சேர்ந்து, வங்கிக் கொள்ளைக்கான திட்டத்துக்கு ‘கொரில்லா’ன்னு பேர் வைக்கறாங்க. அப்படி அவங்களோட அந்த ஆபரேஷன் சக்சஸ்ல முடிஞ்சதா, இல்லை மாட்டிக்கிட்டாங்களான்றதை ஒரு காமெடி த்ரில்லரா சொல்லியிருக்கேன். இவங்க கூடவே படம் முழுக்க ட்ராவல் பண்ற மாதிரியான ஒரு கேரக்டர்ல நிஜ சிம்பன்ஸியும் நடிச்சிருக்கு.