வன்னியர்களுக்கான 10.5 சதவீத உள்ஒதுக்கீடு அவசர கோலத்தில் கொண்டு வந்ததால் நீதிமன்றத்தில் தடை வாங்கப்பட்டது. உச்ச நீதிமன்றம் வரை சென்றுள்ளோம். ஆணையம் கேட்டதாலேயே நீட்டிப்பு வழங்கப்பட்டுள்ளதாக சட்டப்பேரவையில் முதலமைச்சர் ஸ்டாலின் தெரிவித்துள்ளார்.
தமிழ்நாட்டில் மிகவும் பிற்படுத்தப்பட்ட வகுப்பினருக்கான 20% இட ஒதுக்கீட்டில் வன்னியர்களுக்கு 10.50% உள் இடஒதுக்கீடு வழங்குவது குறித்து அரசுக்கு பரிந்துரைப்பதற்காக தமிழ்நாடு பிற்படுத்தப் பட்டோர் ஆணையத்திற்கு அளிக்கப்பட்ட காலக்கெடுவை மேலும் 6 மாதங்களுக்கு நீட்டித்திருப்பது தொடர்பாக பாமக உறுப்பினர்கள் கவன ஈர்ப்பு தீர்மானம் கொண்டுவந்தனர்.
அந்த தீர்மானத்தின் மீது பேசிய பாமக சட்டமன்ற தலைவர் ஜி.கே. மணி, ’’ஆணையத்திற்கு ஒரு மாதம் கால அவகாசம் நீட்டித்தால் போதாதா ? எதற்காக 6 மாதம் நீட்டிக்க வேண்டும் ? அண்மையில் நடைபெற்ற அரசு தேர்வுகளில் ஒரு வன்னியர் கூட தேர்ச்சி பெறவில்லை. இது எவ்வளவு பெரிய அநீதி?’’ என்றார்.
இதற்குப் பதிலளித்த முதலமைச்சர் ஸ்டாலின், ’’10.5 சதவீத உள்ஒதுக்கீடு எந்த சூழலில் எந்த நேரத்தில் எதன் அடிப்படையில் கொண்டு வரப்பட்டது ? தேர்தல் தேதி அறிவிக்கப்பட இருந்த நாளில் அவசர கோலத்தில் கொண்டு வந்ததால் நீதிமன்றத்தில் தடை வாங்கப்பட்டது. உச்ச நீதிமன்றம் வரை சென்றுள்ளோம். ஆணையம் கேட்டதாலேயே நீட்டிப்பு வழங்கியிருக்கிறோம்’’ என்றார்.