பிரபல பாலிவுட் இசையமைப்பாளர் பப்பி லஹிரி காலமானார்

பிரபல பாலிவுட் இசையமைப்பாளரும், பாடகருமான பப்பி லஹிரி உடல் நலக்குறைவால் மும்பையில் இன்று காலமானார். அவருக்கு வயது 69.

இந்தியாவில் 1980 மற்றும் 1990-களில் டிஸ்கோ இசையை பிரபலப்படுத்தியவர், இசையமைப்பாளரும் பாடகருமான பப்பி லஹிரி. உடல்நலக்குறைவு காரணமாக, மும்பையில் உள்ள மருத்துவமனையில் ஒரு மாதகாலமாக சிகிச்சை பெற்று வந்தார். கடந்த 14-ம் தேதி மருத்துவமனையில் இருந்து லஹிரி டிஸ்சார்ஜ் செய்யப்பட்டார். நேற்று நள்ளிரவில் அவருக்கு மூச்சுத்திணறல் ஏற்பட்டதால், மும்பை உள்ள கிரிட்டிகேர் மருத்துவமனையில் அனுமதிக்கப்பட்டார். அங்கு சிகிச்சை பலனின்றி பப்பி லஹிரி உயிரிழந்தார்.

பப்பி லஹிரி, 1973-ம் ஆண்டு ‘நன்ஹா சிகாரி’ என்ற இந்திப் படத்தின் மூலம் பாலிவுட்டில் அறிமுகமானார். இந்தி, தமிழ், தெலுங்கு உள்ளிட்ட மொழிகளில் இதுவரை 200-க்கும் மேற்பட்ட படங்களுக்கு இசையமைத்துள்ளார். தமிழில் 1985-ம் ஆண்டு வெளியான, ‘பாடும் வானம்பாடி’ என்ற திரைப்படத்தின் மூலம் பிரபலமானவர் பப்பி லஹிரி என்பது நினைவில் கொள்ளத்தக்கது.